محلي منبعلرنینگ اطلاعات روزگه معلوم قیلیشیچه، پاکستان کوچلرینینگ نورستان ولایتینینگ کامدیش اولسوالیگیگه اویوشتیرگن هجومی عاقبتیده بیر کیشی یرهلنگن.
منبع نینگ ایتیشیچه، هجوم تیناوون (پنجشنبه،۱۱ سرطان) توشدن کېین کامدیش تومنیگه قرهشلی گوهردیش قیشلاغیده صادر بۉلگن.
اونینگ سۉزلریگه کۉره، هجوم نتیجهسیده محلي اهالیدن بیر کیشی جراحت آلگن.
منبع نینگ قۉشیمچه قیلیشیچه، یرهدار دوالنیش اوچون کنر ولایت شفاخانهسیگه آلیب باریلگن.
خبرده اسمی آشکار اېتیلیشینی ایستهمهگن منبع طالبان نینگ یرهدارنی شفاخانهگه یېتکزیش و دوالش بارهسیدهگی اعتبارسیزلیگیدن شکایت قیلیب، او محلي اهالی تامانیدن کنر ولایتیگه آلیب باریلگنینی ایتدی.
منبع، شونینگدېک، پاکستان کوچلری نینگ هجوملریدن سۉنگ گوهردیش قیشلاغیدهگی بیر قنچه عایلهلر اۉز اویلرینی ترک اېتیب، باشقه حدودلرگه کۉچیب کېتگنینی دعوا قیلماقده.
حاضرگچه طالبان نینگ نورستاندهگی محلي رسميلری پاکستان کوچلری نینگ سۉنگگی هجوملری یوزهسیدن هېچ قندهی ایضاح بېرمهگن.
اېسلهتیب اۉتمیز، پاکستان حربي اوچاقلری هفته باشیده پکتيا، پکتیکا و کنر ولایتلریگه هم ضربهلر بېرگن اېدی. بیرلشگن ملتلر تشکیلاتینینگ تصدیقلشیچه، اوشبو هجوملر عاقبتیده کمیده۲۸ کیشی هلاک بۉلگن، ینه۴۹ کیشی یرهلنگن.
