طالبلر مالیه وزیرلیگی افغانستانگه اۉنگ رولدهگی موترلرنی وارد قیلیش منع اېتیلگنینی اعلان قیلدی.
طالبلر مالیه وزیرلیگی مطبوعات سۉزلاوچیسی عبدالقیوم ناصر بوگون (شنبه، ۱۳ سرطان) ایکس اجتماعي ترماغیده اوشبو قرار طالبلر وزیرلر کېنگشی قراریگه اساسن قبول قیلینگنینی معلوم قیلدی.
طالبلر مالیه وزیرلیگی مطبوعات سۉزلاوچیسی بو بارهده قۉشیمچه تفصیلات بېرمهدی.
بیراق بوندن آلدین گروه رسميلری اۉنگ رولدهگی موترلر افغانستان نینگ یۉل حرکتی تیزیمیگه ماس کېلمسلیگی و کۉپلب ترافیک حادثهلرینینگ اساسي سببلریدن بیری اېکنینی تأکیدلهگن اېدی.
طالبلر هم عمل قیلهیاتگن افغانستان یۉل حرکتی قاعدهلریگه کۉره، موترلرنینگ رولی چپ تامانده بۉلیشی کېرهک.
بوندن آلدین هم طالبلر ایچکی ایشلر وزیرلیگی اوشبو توردهگی موترلرنینگ حرکتینی باسقیچمه-باسقیچ چېکلش و آخر-عاقبت بوتونلهی تعقیقلش رېجهلشتیریلهیاتگنینی بیلدیرگن اېدی.
خبرلرگه کۉره، طالبلر مالیه وزیرلیگی باجخانه باشقرمهسی نینگ کۉرسهتمسیگه بناءً، پنجشنبه کونیدن باشلب مملکت باجخانهلریده اۉنگ رولدهگی موترلرنی رسميلشتیریش تۉختهتیلگن.
شونگه قرهمهی، اوّلراق مینگلب اۉنگ رولدهگی موترلر افغانستانگه آلیب کیریلگن و حاضر هم مملکت یۉللریده حرکتلنماقده.
حاضرچه طالبلر اوشبو تعقیقدن سۉنگ بوندهی موترلر حرکتینی هم تۉختهتهدیمی یاکه اولرگه قتناونی دوام اېتتیریشگه رخصت بېرهدیمی، بو مسأله انیق اېمس.
