طالبلر مدافعه وزیری محمد یعقوب مجاهد گروهنینگ محلي قوماندانی جمعهخان فاتح بیلن ایچکی ضدیتلر کوچهیگنی حقیدهگی خبرلر نشر بۉلگن بیر پیتده بدخشانگه سفر قیلدی.
طالبلر مدافعه وزیرلیگی بوگون (یکشنبه،۱۴-سرطان) نشر قیلگن بیاناتیده ایتیلیشیچه، مجاهد اوشبو سفر دوامیده بدخشان ولایتی نینگ تورلی اولسواللیکلری همده چین، تاجیکستان و پاکستان بیلن چېگرهداش حدودلرنی کۉزدن کېچیرگن.
بیاناتگه کۉره، طالبلر مدافعه وزیری زیباک، اشکاشیم، کران و منجان اولسواللیکلری، شونینگدېک، واخان توپخانه پونکتی و پامیر حدودیگه تشریف بویورگن.
او، شونینگدېک، چین، تاجیکستان و پاکستان بیلن چېگرهداش اَیریم «مهم و استراتژیک» منطقهلرده هم بۉلگن.
بیاناتده قید اېتیلیشیچه، مجاهد سفر دوامیده چېگرهچیلر فعالیتی و جنگاور شَیلیگینی بهالب، «مملکت حدودي یخلیتلیگی، ملي حاکمیت و دولت چېگرهلرینی حمایه قیلیش» ضرورلیگینی تأکیدلهگن.
او چېگره قۉشینلری صلاحیتینی کوچهیتیریش و اولرگه ضرور جهازلر یېتکزیب بېریلیشینی وعده قیلگن.
محمد یعقوب مجاهدنینگ اوشبو سفری بدخشانده طالبلر بیلن گروهنینگ محلي قوماندانی جمعهخان فاتح اۉرتهسیدهگی ایچکی کېسکینلیک کوچهیگن بیر پیتگه تۉغری کېلماقده.
جمعهخان فاتح بدخشاندهگی دروازنینگ بېش تومنی بۉییچه عمومي امیرلیک لوازمیدن آلینیب، زابل ولایتی حاکمی اۉرینباسری اېتیب تعیینلنگن اېدی.
بیراق او ینگی لوازمینی ترک اېتدی و کېینچهلیک بو وظیفهدن هم چېتلهتیلدی.
او اۉتگن آی بدخشانده اۉتکزیلگن ییغینلرده اۉز اختیاریده قریب۲:۵مینگ قوراللی جنگچی و۱۰ مینگدن آرتیق سفربر اېتیلیشی ممکن بۉلگن کوچ بارلیگینی معلوم قیلگن اېدی.
خبرلرگه کۉره، فاتح هېچ قندهی رسمي لوازمگه اېگه بۉلمهسه-ده، درواز حدودیگه کیریش یۉللریده، خصوصاً نسی اولسواللیگیده نظارت-پُستهلری تشکیل اېتگن.
شوندن سۉنگ اَیریم یېتکرمهلر طالبان بدخشانلیک اعضالردن عبارت هیئتنی اونینگ حضوریگه یوباریب، مسوولیتسیز حرکتلردن واز کېچیشگه چقیرگنی حقیده خبر بېرگن.
شو بیلن بیرگه، یقینده نشر قیلینگن ویدېو مراجعتیده جمعهخان فاتح طالبان بیلن اختلافی بارلیگینی رد اېتیب، بو توزوم اوچون قربانلیک بېرگنینی و هنوز اونگه صادق اېکنینی ایتگن.
شونینگدېک، طالبان حلی رسماً تصدیقلهمهگن خبرلرگه کۉره، فاتح نینگ احتمالي قۉزغلانی نینگ آلدینی آلیش و اونی باستیریش مقصدیده باشقه ولایتلردن بدخشانگه کۉپلب کوچلر یوباریلگن.
اما فاتح اۉزیگه قرشی کوچ ایشلهتیلیشیگه سبب بۉلهدیگن هېچ قندهی ایش قیلمهگنینی، طالبان بیلن هم هېچ قندهی نزاع یۉقلیگینی و یرهشوو اوچون اورینیشگه احتیاج موجود اېمسلیگینی تأکیدلهگن.
جمعهخان فاتح سۉنگگی اودیو مراجعتیده طالبان هیئاتی نینگ بدخشانگه او بیلن مذاکره اۉتکزیش اوچون کېلگنی حقیدهگی خبرلرنی هم رد اېتگن.
