بیرلشگن ملتلر تشکیلاتینینگ قاچقینلر ایشلری بۉییچه عالي کمیساری برهم صالح و بیرلشگن ملتلر تشکیلاتی ترقیات دستوری باشلیغی الکساندر دی کرو اوچ کونلیک تشریف بیلن کابولگه یېتیب کېلدی.
بیرلشگن ملتلر تشکیلاتینینگ اوشبو ایکّی یوقاری مرتبهلی نمایندهسی بوگون (یکشنبه، ۱۴-سرطان) کابلگه کېلیب، طالبلرنینگ قاچقینلر ایشلر بۉییچه وزیرلیک رسمیلری تامانیدن کوتیب آلیندی.
یوناما مطبوعات سۉزلاوچیسی ترقتگن بیاناتده ایتیلیشیچه، اوشبو تشریف افغانستان خلقینینگ معمالرینی بېواسطه تینگلش همده بیرلشگن ملتلر تشکیلاتی موجود یېچیملرنی قندهی قۉللب-قوّتلهیاتگنینی یخشیراق انگلش امکانینی بېرهدی.
بیاناتگه کۉره، مذاکرهلرده وطنگه قَیتهیاتگن مهاجرلر، ایچکی کۉچیریلگن شخصلر و اولرنی قبول قیلهیاتگن محلهلر دوچ کېلهیاتگن باسیملر اساسي موضوع بۉلهدی.
یوناما مطبوعات کاتبینینگ تأکیدلشیچه، خلق ارا مبلغ و اعتبار کمهییب بارهیاتگن بیر پیتده، هیئت افغانستان خلقینی، اینیقسه عیاللر، قیزلر، قَیتگن مهاجرلر و اولرنی قبول قیلهیاتگن محلهلرنی اوزلوکسیز همده موافقلشتیریلگن طرزده قۉللب-قوّتلش مهملیگینی تأکیدلهیدی.
بیرلشگن ملتلر تشکیلاتینینگ یوقاری مرتبهلی نمایندهلری افغانستانگه طالبلر چېکلاولری کوچهییب، مملکتدهگی انسانی وضعیت ینه-ده آغیرلشهیاتگن بیر وقتده تشریف بویوردی.
بیرلشگن ملتلر تشکیلاتی معلوماتلریگه کۉره، جاري ییلده افغانستانده۲۱.۹میلیون کیشی انسان پرورلیک یاردمگه محتاج. تشکیلات اوشبو احتیاجلرنی قاپلش اوچون۱.۷ میلیارد امریکا دالری سۉرهگن بۉلسه-ده، حاضرگچه مبلغ نینگ اتیگی۱۶ فایزی تأمینلنگن.
