جهان ساغلیقنی سقلش تشکیلاتینینگ شرقي اۉرته یېر دېنگیزی منطقوي دفتری مسوولی داکتر حنان حسن بلخی طالبلر باش وزیری نینگ اداری اۉرینباسری عبدالاسلام حنفی بیلن اوچرهشووده: «اگر پولیونی یۉق قیلیش بۉییچه همکارلیک ینه-ده کوچهیسه، کېلگوسی ۱۲آی ایچیده افغانستانده پولیونی بوتونلهی یۉق قیلیشیمیز ممکن»، دېدی.
طالبلر باش وزیری ادارهسی بیاناتیگه کۉره، بوگون (یکشنبه، ۱۴-سرطان) بۉلیب اۉتگن اوچرهشووده داکتر بلخي: «پولیونی یۉق قیلیش بارهسیده یخشی یوتوقلرگه اېریشدیک، بیراق حلی هم کۉپراق اعتبار ضرور»، دېیه تأکیدلهدی.
بیاناتده ایتیلیشیچه، جهان ساغلیقنی سقلش تشکیلاتی نمایندهسی طالبلر تامانیدن خوفسیزلیک تأمینلنگنی طفیلی پولیوگه قرشی اېملش کمپاینلری افغانستانده ثمرهلی عملگه آشیریلهیاتگنینی بیلدیرگن.
حالبوکه، طالبلر حاکمیتگه قَیتیشیدن اوّل مملکت نینگ اَیریم حدودلریده، جملهدن جَنوبي و شرقي ولایتلرده پولیوگه قرشی اېملش کمپاینلریگه تۉسقینلیک قیلگن اېدی.
شو بیلن بیرگه، جهان ساغلیقنی سقلش تشکیلاتی معلوماتلریگه کۉره، جاري ییلده افغانستانده پولیونینگ۶ ته انساني حالتی و۳۴ته اطراف-محیط حالتی قید اېتیلگن.
۲۰۲۵ییلده اېسه مملکتده جمعی۲۱ ته انساني و۹۴ ته اطراف محیط پولیو حالتی انیقلنگن.
حاضرده افغانستان و پاکستان پولیو (بالهلر فلجی) کسللیگی حلی هم تۉلیق یۉق قیلینمهگن دنیادهگی یگانه ایکّی دولت حسابلنهدی.
دنیا ساغلیقنی سقلش تشکیلاتی معلوماتیگه کۉره، جاري ییلده پاکستانده هم پولیونینگ۳ ته انساني و۹۰ ته اطراف محیط حالتی قید اېتیلگن.
پولیو اساسن بېش یاشگچه بۉلگن بالهلرنی ضررلهیدیگن یوقوملی ویروسلی کسللیکدیر.
او افلاسلنگن آزیق-طعام، سوو یاکه یقین ملاقات آرقهلی یوقهدی همده دایمي فلجلیک یاکه اۉلیمگه آلیب کېلیشی ممکن.
بو کسللیکنی دوالشنینگ امکانی یۉق. بیراق خوفسیز و ثمرهلی واکسینلر آرقهلی اونینگ آلدینی آلیش ممکن.
