فرانسه اخبارات آژانسینینگ خبر بېریشیچه، طالبلر و پاکستان اۉرتهسیدهگی اوروش عاقبتیده افغانستان–پاکستان چېگره اۉتیش یۉللری نینگ یاپیلیشی همده امریکا و اسرایل نینگ ایران بیلن اوروشی سببلی هرمز بۉغازیدهگی وضعیت افغانستانده موتر پرزهجات قِسملری سوداسی نینگ کېسکین سوسهییشیگه آلیب کېلگن.
خبرگزارلیک معلوماتیگه کۉره، افغانستان جَنوبیدهگی قندهار ولایتی نینگ سپین بولدک بازاریده ایلگری جوده گوجوم بۉلگن موترلر پرزهجات سوداسی حاضر دېیرلی تۉختهب قالگن.
حساباتگه کۉره، بازارگه بیرینچی جدّي ضربه ۲۰۲۵ییل اوکتبر آییده طالبان و پاکستان اۉرتهسیدهگی چېگره تۉقنهشوولری سبب ایکّی دولت اۉرتهسیدهگی چېگره اۉتیش یۉلی یاپیلگنده بېریلگن.
قندهارتجارت و سرمایه یاتقیزیش اتاقی رئیسی اۉرینباسری عبدالباقي فرانسه خبرگزارلیگیگه شوندهی دېگن: «پاکستان بیلن چېگره یاپیلگچ، صادرات و واردات اېران نینگ بندر عباس پورتی آرقهلی کتّه قیینچیلیک بیلن عملگه آشیرردیک، اما هېچ بۉلمهسه یۉل بار اېدی.» چېگره یاپیلیشیدن آلدین افغان سوداگرلری موتر پرزهجات قِسملرینی پاکستان آرقهلی قوروقلیک یۉلی بیلن سپین بولدهککه آلیب کیریشردی.
کېینچهلیک اېسه بو محصولاتلرنی بیرلشگن عرب امیرلیکلری و هرمز بۉغازی آرقهلی تشیشگه مجبور بۉلیشدی.
بو یۉل اوزاقراق و قیمتراق بۉلسه-ده، فعالیتنی دوام اېتتیریش امکانینی بېرگن.
بیراق قندهار تجارت سرمایه یاتقیزیش اتاقی رئیسی اۉرینباسری یقین شرقده اوروش باشلنیشی افغانستان اوچون «جدّي معمالر» توغدیرگنینی ایتدی.
سپین بولدکدهگی محلي سوداگر اسدالله فرانسه خبرگزارلیگیگه اوروش اونینگ بیزنسینی «بیر نېچه آی» دوامیده فلج قیلگنینی ایتدی.
اونینگ سۉزلریگه کۉره، اوروشدن آلدین هر کونی ایکّی کانتېنېر یوک توشیرر، هر بیر کانتېنېرنی تشیش نرخی۲ مینگ امریکا دالرینی تشکیل اېتردی.
اوروش باشلنگنیدن سۉنگ اېسه بو خرجت۸ مینگ دالرگچه آشگن. سوداگر نینگ ایتیشیچه، اونینگ قریب۳۰ ته کانتېنېری جاپان و بیرلشگن عرب امیرلیکلریده قالیب کېتگن.
بونگه دبی دهگی منطقه نینگ اېنگ ییریک لاگیستیکه مرکزلریدن بیری بۉلگن «جبل علی» پورتیدهگی کېچیکیشلر سبب بۉلگن.
افغانستاندهگی ینه بیر احتیاط قِسملر سوداگری مسعود فرانسه خبرگزارلیگیگه اېران بیلن اوروش باشلنگنیدن بویان «هېچ قندهی سودا قیلمهگنینی» ایتدی.
او شوندهی دېدی: «آلدین هر آی اۉنلب، حتا یوزلب کانتېنېر آلیب کیرردیک، حاضر اېسه بو کۉرستکیچ صفرگه توشگن.» مسعود نینگ ایتیشیچه، اونینگ اَیریم کانتېنېرلری بیرلشگن عرب امیرلیکلریگچه یېتیب بارگن، بیراق انبار خرجتلری آشگنی سببلی اولرنی ینه جاپانگه قَیتریشگه مجبور بۉلگن.
او: «باشقه چارهمیز یۉق. مقابل یۉلنی کۉرمهیهپمن. بو تۉلیق ضرر»، دېدی. فرانسه خبریگه کۉره، بو وضعیت نهفقط سوداگرلر، بلکه سپین بولدکدهگی موتر ییغیش اوستاخانهلری و ایشچیلرگه هم سلبي تأثیر کۉرسهتگن.
۳۰ییلدن بویان اوستاخانه اېگهسی بۉلگن سمیعالله شوندهی دېدی: «آلدین هر هفته بېش-یېتّیته موتر ییغردیک، اما ینگی احتیاط قِسملر یېتیب کېلمهیاتگنی سببلی ایش بوتونلهی تۉختهدی.»
او ینه قۉشیمچه قیلدی: «اگر بو حالت دوام اېتسه، قیلهدیگن ایشیمیز قالمهیدی و هر کونی کۉپراق ضرر کۉرهمیز. شونگه قرهمهی، ایشچیلریم نینگ معاشینی تۉلهشیم کېرهک.»
سپین بولدکدهگی جرثقیل هیداوچیسی محمد نعیم هم وضعیت یخشیلنمسه، بو ایشنی تشلب، باشقه کسب ایزلشگه مجبور بۉلیشینی ایتدی.
یقین شرقدهگی اوروش نهفقط افغانستانده موتر پرژه جاتلری سوداسیگه، بلکه مملکتگه گومانیتار یاردملرنی یېتکزیشگه هم سلبي تأثیر کۉرسهتگن.
جهان آزیق-طعام دستوری جوزا آییده۴۰۰ تُن ویتامینلشتیریلگن بیسکیوتنی۹ مینگ کیلومتر مصافهنی باسیب اۉتیب و دنیا نینگ۱۵ مملکتی آرقهلی افغانستانگه یېتکزگنینی معلوم قیلگن.
تشکیلات آزیق-طعام یاردمینی افغانستانگه یېتکزیش خرجتلری اوچ برابر آشگنینی هم بیلدیرگن.
