جهان بانکی ینگی گزارشیده افغانستانده سوو منبعلرینی باشقریش و آزیق-طعام تأمیناتی زنجیریگه سرمایه کیریتیشنی توصیه اېتماقده. عکس حالده، مملکتدهگی آزیق-طعام خوفسیزلیگی ینهده جدّي تهدیدلر آستیده قالیشی ممکن.
جهان بانکی نینگ «آزیق-طعام خوفسیزلیگینی مستحکملش و ایش اۉرینلری یرهتیش: یقین شرق، شمالي افریقا، افغانستان و پاکستان اوچون سیاسي یۉنهلیشلر» ناملی ینگی گزارشی نشر قیلیندی.
گزارشده قید اېتیلیشیچه، آزیق-طعام تأمیناتی زنجیریگه سرمایه کیریتیش و اصلاحاتلر عملگه آشیریلسه، ۲۰۲۵-ییلگچه اوشبو ساحهده 5 میلیوندن آرتیق ینگی ایش اۉرنی یرهتیش امکانیتی موجود.
جهان بانکی پیشبینلیگیگه کۉره: «کېنگ کۉلملی سرمایه اجرا اېتیش، بیزنس محیطینی اصلاح قیلیش، قیشلاق خۉجهلیگی تکنالوژيلرینی رواجلنتیریش، سوغاریش تیزیمینی یخشیلش همده بوتون منطقهده (جملهدن افغانستانده) آزیق-طعام قیمت زنجیرینی مودرنیزتسیه قیلیش نتیجهسیده ۲۰۲۵-ییلگچه قیشلاق خۉجهلیگی و آزیق-طعام صناعتیده ۵ میلیون ینگی ایش اۉرنی یرهتیلهدی.»
تشکیلات نینگ تأکیدلشیچه، افغانستان اقلیم اۉزگریشی، قورغاقچیلیک و سوو تنقیصلیگیدن اېنگ کۉپ ضرر کۉرهدیگن مملکتلردن بیریدیر.
جهان بانکی: «سوو منبعلرینی باشقریشگه سرمایه کیریتیلمسه، مملکت نینگ آزیق-طعام خوفسیزلیگی ینهده کوچلی تهدید آستیده قالهدی»، دېیه تأکیدلهگن.
بانک نینگ توصیهسیگه کۉره، افغانستان کبی بېقرار دولتلرده سیاست نینگ اوستوار یۉنهلیشلری اهالی نینگ آزیق-طعامگه زودلیک بیلن کیریشینی تأمینلش، محلي قیشلاق خۉجهلیگی ایشلب چیقریش صلاحیتینی سقلب قالیش همده اقتصادي و خوفسیزلیک برقرارلیگی یخشیلنگنی سری قیشلاق خۉجهلیگی و آزیق-طعام صناعتینی باسقیچمه-باسقیچ تیکلشدن عبارت بۉلیشی کېرهک.
گزارشده افغانستان آزیق-طعام سوداسی بۉییچه صاف ایمپورت قیلووچی دولت اېکنی، چونکه مملکت آزیق-طعام خوفسیزلیگینی تأمینلش اوچون ایمپورتگه تهیهنیشی قید اېتیلگن.
شو بیلن بیرگه، آزیق-طعام سوداسی افغانستان اوچون سوو منبعلری تنقیصلیگینی قاپلش و آزیق-طعام احتیاجلرینی تأمینلشده مهم رۉل اۉینهیدی.
حساباتده اۉرگنیلگن دولتلر آرهسیده افغانستان آزیق-طعام ایمپورتی آرقهلی ایچکی سوو منبعلری نینگ سېزیلرلی قِسمینی سهقلب قالهیاتگن مملکتلردن بیری حسابلنهدی.
چونکه قیشلاق خۉجهلیگی محصولاتلرینی ایمپورت قیلیش ایچکی سوو صرفینی بالواسطه کمهیتیرهدی. جهان بانکی معلوماتیگه کۉره، افغانستانده اهالی جان باشیگه یلپی ایچکی محصولات هنوز ۴۰۰اقش دالری اطرافیده بۉلیب، بو منطقهدهگی اېنگ پست کۉرسهتکیچدیر.
اهالی جان باشیگه ییم نینگ اۉسمهیاتگنی و آزیق-طعام خوفسیزلیگی یخشیلنمهیاتگنی نینگ اساسي سببی اوروش، خوفسیزلیک نینگ یۉقلیگی و زۉرآورلیک عاقبتیده دوام اېتهیاتگن ضررلر حسابلنهدی.
افغانستان عراق، لبنان، لبیا، سوريه، غربي ساحل و غزه همده یمن بیلن بیر قطارده منطقهدهگی آزیق-طعام خوفسیزلیگی انقراضیگه اوچرهگن اهالی نینگ کتّه قِسمینی اۉزیده جمعلهگن.
جهان بانکی حساباتیده قید اېتیلیشیچه، افغانستان، غزه، سوريه و یمنده ۲۴ میلیوندن آرتیق کیشی «آزیق-طعام خوفسیزلیگی نینگ تۉرتینچی یاکه اوندن یوقاری فوق العاده باسقیچی»ده یشهماقده.
بو اولر نینگ جوده آغیر آزیق-طعام تنقیصلیگی خوفی آستیده اېکنینی انگلهتهدی. بیرلشگن ملتلر تشکیلاتی معلوماتیگه کۉره، حاضرده افغانستان اهالیسی نینگ 51 فایزی آزیق-طعام خوفسیزلیگیگه اېگه اېمس و کوندهلیک حیاتینی دوام اېتتیریش اوچون انسان پرورلیک یاردمگه محتاج.
بیرلشگن ملتلر تشکیلاتی حساباتلریده اقلیم اۉزگریشی، جملهدن کېتمه-کېت قورغاقچیلیکلر، طبيعي آفتلر، خصوصاً سوو تاشقینلری، شونینگدېک اوروش و زۉرآورلیک، مهاجرلر نینگ مجبوري قَیتیشی همده سیاسي و اقتصادي معمالر افغانستاندهگی آزیق-طعام خوفسیزلیگی یامانلشووی نینگ اساسي عامللری صفتیده کۉرسهتیلگن.
