حاضرده طالبلر نظارتیدهگی ملي امتحانلر ادارهسی بوگون (دوشنبه، ۱۵-سرطان) کېتمه-کېت تۉرتینچی ییل قیزلرسیز اۉتکزیلگن ۱۴۰۵-ییلگی کانکور امتحانی نتیجهلرینی اعلان قیلدی.
اوشبو اداره معلوماتیگه کۉره، پروان ولایتیدن پهلواننینگ اۉغلی راشد۳۶۰ نمره تۉپلب، مملکت بۉییچه بیرینچی اۉریننی اېگهلهدی و کابل طبیات بیلیم یورتینینگ عمومي طبیات فاکولتهسیگه اۉقیشگه قبول قیلیندی.
طالبلرنینگ ملي امتحانلر ادارهسی باشلیغی عبدالباقي حقّانينینگ ایتیشیچه، راشد کانکور امتحانی تاریخیده ایلک بار ماکسیمال۳۶۰نمره تۉپلهگن نامزاد بۉلدی.
مذکور اداره معلوماتیگه کۉره، کنر ولایتیدن شیرزماننینگ اۉغلی انعامالله۳۵۸.۰۹۳۷نمره بیلن ایکّینچی اۉریننی اېگهللب، کابل بیلیم یورتی نینگ عمومي طبیات فاکولتهسیگه قبول قیلیندی.
شونینگدېک، پکتيا ولایتیدن عبدالرحمننینگ اۉغلی عبدالهادي۳۵۶.۹۶۷۹۱بال بیلن اوچینچی اۉریننی اېگهلهدی و کابل طبیات بیلیم یورتینینگ عمومي طبیات فاکولتهسیگه قبول قیلیندی.
پکتيا ولایتیدن محمدبشیرنینگ اۉغلی محمد ایمن۳۵۶.۹۶۷۹۰نمره بیلن تۉرتینچی، میدان وردک ولایتیدن محمد عمرنینگ اۉغلی بسم الله جان اېسه۳۵۶،۸۵۷۹نمره بیلن بېشینچی اۉریننی اېگهلهدی.
اولر هم کابل طبیات بیلیم یورتینینگ عمومي طبیات فاکولتهسیگه قبول قیلیندی.
کانکور نتیجهلرینی اعلان قیلیش مراسمی طالبلر باش وزیری نینگ اداری اۉرین باسری عبدالسلام حنفی اشتراکیده اۉتکزیلدی. حنفی اۉز نطقیده جاري ییلگی کانکور امتحانیده مملکت مکتبلری و مدرسهلریدن۱۱۷ مینگ کیشی اۉقووچی قتنهشگنینی ایتدی.
او امتحاننینگ برچه باسقیچلری ترتیبلی و شفّاف طرزده اۉتکزیلگنینی دعوا قیلدی.
طالبلر افغانستاننی قَیته اېگهلهگنیدن سۉنگ قیزلرگه فقط بیر ییل کانکور امتحانیده قتنهشیشگه رخصت بېردی.
شوندن کېین اېسه اولرنینگ اوشبو امتحانده اشتراک اېتیشینی تعقیقلهدی.
طالبان حاکمیتنی قَیته اېگهللشیدن و قیزلر تعلیمی تعقیقلنیشیدن آلدین اېسه کېتمه-کېت اوچ ییل دوامیده کانکور امتحانیده قیزلر مملکت بۉییچه بیرینچی اۉریننی اېگهلهگن اېدی.
