پاکستاننینگ بلوچستان ایالتیدهگی زیارت اولسواللیگیده قوراللی هجومچیلر پولیس نظارت-پُستهسیگه هجوم قیلیشی عاقبتیده تۉقّیز پولیس خادیمی اۉلگن ینه بېش کیشی یرهلندی.
جیو نیوز خبریگه کۉره، زیارت اولسواللیگی پولیس باشلیغی وظیفهسینی بجرووچی عبدالقدوس هجومچیلر دوشنبه کونی کېچقورون اولسواللیکنینگ منگی حدودیدهگی پولیس پُستهسیگه هجوم قیلگنینی معلوم قیلگن.
اونینگ تصدیقلشیچه، هجومچیلر هجومدن سۉنگ بېش پولیس خادیمینی اۉزلری بیلن آلیب کېتگن.
شو بیلن بیرگه، بلوچستان ایالتی حکومتی مطبوعات سۉزلاوچیسی شاهد ریندنینگ ایتیشیچه، هجوم آرتیدن اۉتکزیلگن تازهلش عملیاتی دوامیده خوفسیزلیک کوچلری و پولیس «فتنه الخوارج» گروهی بیلن علاقهدار 15 نفر جنگرینی یۉق قیلگن.
او شوندهی دېدی: «بلوچستانده ترورچیلر اوچون هېچ قندهی خوفسیز باشپناه بۉلمهیدی و هر قندهی هجوم قطعي جواب آلهدی.»
ریندنینگ قۉشیمچه قیلیشیچه، ترورچیلرگه قرشی عملیاتلر ایالت بۉیلب دوام اېتتیریلهدی.
پاکستان رسميلری طالبلر افغانستانده حاکمیتگه قَیتگنیدن بویان مملکتده، اینیقسه اونینگ شِمالی-غربي حدودلریده هجوملر سانی آرتگنینی تأکیدلهماقده.
اسلام آبادگه کۉره، پاکستاندهگی قوراللی گروهلر افغانستان توپراغیدن توریب پاکستان ایچیده هجوملر اویوشتیرماقده.
طالبلر اېسه پاکستاندهگی خوفسیزلیک بیلن باغلیق وضعیت نینگ یامانلشیشینی اوشبو مملکت خوفسیزلیک ادارهلری نینگ ضعیفلیگی بیلن ایضاحلهماقده.
