طالبلر نینگ کانلر و پترولیم وزیرلیگی هرات ولایتینینگ غوريان اولسواللیگی حدودیدهگی نمکسار کانینینگ بیرینچی بلاکی بۉییچه ۱۵ ییللیک قزیب آلیش شرطنامهسینی “اسماعیل شېرزاد عزیزی” خصوصي شرکتی بیلن امضالهگنینی معلوم قیلدی.
وزیرلیک سهشنبه کونی (۱۶سرطان) بیلدیرگنیگه کۉره، شرطنامه غوريان تومنیدهگی نمکسار کانینینگ۱۰.۲۴کوادرات کیلومتردن آرتیق حدودینی قمرهب آلهدی. لایحه دایرهسیده شرکت۳۱۵ میلیون۵۹۴ مینگ افغاني مقداریده سرمایه کیریتهدی.
طالبلر کانلر و پترولیم وزیرلیگی معلوماتیگه کۉره، شرطنامه هر بیر تُن توز اوچون۱مینگ۵۰۰ افغاني رویالتی اساسیده توزیلگن. شونینگدېک، شرکت برچه فعالیتینی کانلر تۉغریسیدهگی قانون، عملدهگی ترتیب-قاعدهلر همده شرطنامهده بېلگیلنگن مجبوريتلرگه موافق، شفّاف و مسوولیتلی طرزده آلیب باریشی شرط.
وزیرلیک بیاناتیده ایتیلیشیچه، شرکت اجتماعي خدمتلر اوچون۵ میلیون افغاني مبلغ اجرهتهدی همده اطراف-محیطنی محافظه قیلیش بۉییچه اۉز ذمّهسیدهگی مجبوريتلرنی هم بجرهدی.
طالبلر سۉنگّی کونلرده اوشبو توز کانینینگ تۉرتینچی بلاکینی هم۱۵ ییل مدتگه باشقه بیر خصوصي کمپنیگه بېرگن اېدی. گروه بوندن اوّل ثور آییده اوچینچی بلاک، همده حمل آییده بېشینچی بلاکنی هم ایکّی خصوصي شرکت بیلن۱۵ ییل مدتگه شرطنامه اساسیده تاپشیرگن.
طالبلر افغانستان کانلرینی قزیب آلیش بۉییچه کېتمه-کېت شرطنامهلر امضالهیاتگن بیر پیتده، مملکت طبيعي بایلیکلرینی باشقریش سیاستی کېنگ تنقیدلرگه اوچرهماقده. اَیریم سیاسي گروهلر طالباننی مملکت کان بایلیکلرینی “تالان-تاراج قیلیش”ده عیبلهماقده.
