افغانستان خبرچیلر مرکزینینگ معلوم قیلیشیچه، “پیگرد” خبر گزارلیگینینگ اېگهسی و باش محرری جاوید نیازي طالبلر استخباراتی حبسخانهسیده ایکّی آی سقلنگنیدن سۉنگ آزاد اېتیلگن.
مرکزنینگ بیر منبعگه تهیهنیب بیلدیریشیچه، نیازي تیناوون (۱۶-سرطان، سهشنبه) ساعت۹:۰۰اطرافیده طالبلر استخبارات باشقرمهسی نینگ۴۰-ادارهسی قماقخانهسیدن آزاد قیلینیب، عایلهسی بغریگه قَیتگن.
افغانستان خبرچیلر مرکزی ژورنالیست نینگ آزاد اېتیلیشینی آلقیشلهگن، بیراق اونینگ۶۳ کون دوامیده آزادلیکدن محروم اېتیلگنینی انساني و کسبي حقوقلرینینگ آچیقدن-آچیق بوزیلیشی دېب بهالب، قارهلهگن.
مرکزنینگ تأکیدلشیچه، جاوید نیازي آزاد اېتیلگن بۉلسه-ده، “پیگرد” اخبارات آژانسی ادارهسی همان مُهرلنگن و اونینگ فعالیتیگه رخصت بېریلمهگن.
مرکز بیاناتیگه کۉره، طالبلر استخبارات خادملری۳می جهان مطبوعات اېرکینلیگی کونیده کابلدهگی “پیگرد” اخبارات آژانسی ادارهسیگه باستیریب کیرگن. اولر ژورنالیستلرگه نسبتاً قۉپال و زۉرآور مناسبتده بۉلیب، خبرگزارلیککه تېگیشلی ایکّی ته کامپیوتر، اوچته سمارت فون همده اۉشه پیتده ادارهده بۉلگن باشقه ایکّی خصوصي یېتکرمه ژورنالیستینی هم اۉز ایچیگه آلگن اوچ نفر ژورنالیست نینگ تیلفونلرینی مصادره قیلگن.
شونینگدېک، مرکز نینگ معلوم قیلیشیچه، طالبان استخباراتی ۱۶-ثور کونی نیازينی مصادره قیلینگن جهازلرینی قَیتریب آلیش اوچون ادارهگه چقیرگن، بیراق او کېلگنیدن سۉنگ حبسگه آلینگن.
افغانستان خبرچیلر مرکزی معلوماتیگه کۉره، حاضرگچه نیازيگه قندهی عیبلاو قۉییلگنی و اونینگ قندهی اساسده آقلنگنی حقیده تفصیلاتلر آشکار قیلینمهگن. طالبان رسميلری هم بو بارهده ایضاح بېرمهگن.
مرکز طالباننی ژورنالیستلر و یېتکرمهلر خادملری نینگ حقوقلرینی حرمت قیلیشگه، “پیگرد” اخبارات آژانسی فعالیتینی هېچ قندهی شرطسیز قَیته تیکلشگه همده مصادره قیلینگن ایش قوراللرینی اگېنتلیک و ژورنالیستلرگه قَیتریشگه چقیردی.
