بیرلشگن ملتلر تشکیلاتینینگ افغانستاندهگی یاردم ادارهسی (یوناما) افغانستان اهالیسینی۴۸.۶ میلیون نفر دېب اعلان قیلگن بۉلسه، طالبلر نظارتیدهگی ملي احصائیه و معلومات ادارهسی مملکت اهالیسی۳۷.۲میلیون نفر اېکنینی معلوم قیلدی.
تورلی رقملر بوگون (شنبه، ۲۰-سرطان) بوتون جهان اهالی کونی مناسبتی بیلن اعلان قیلیندی. ۱۱-جولای بوتون جهان اهالی کونی صفتیده نشانلنهدی.
یوناما فیسبوکدهگی بیاناتیده ۲۰۲۶-ییلده افغانستان اهالیسی۴۸.۶میلیون نفرگه یېتیشی پیشبینلیک قیلینهیاتگنینی بیلدیردی.
ادارهنینگ تأکیدلشیچه، انیق دموگرافیک معلوماتلر ساغلیقنی سقلش خدمتلرینی یخشیلش، جندر تېنگلیگینی رواجلنتیریش، جمعیت نینگ برقرارلیگینی مستحکملش همده برقرار ترقیاتگه قرهتیلگن ثمرهلی سیاست و دستورلرنی ایشلب چیقیشده مهم اهمیتگه اېگه.
شو بیلن بیرگه، طالبلر نظارتیدهگی ملي احصائیه و معلومات ادارهسی هم جاري ییل اوچون اهالی سانی بۉییچه اۉز حساب-کتابلرینی اعلان قیلدی. اوندهگی کۉرستکیچ بیرلشگن ملتلر تشکیلاتی معلوماتیدن۱۰ میلیوندن آرتیق کم.
مذکور اداره بیاناتیگه کۉره، ۱۴۰۵-هجري-شمسي ییلیده افغانستان اهالیسی۳۷.۲میلیون نفرگه یېتهدی.
حساب-کتابلرگه کۉره، مملکت اهالیسی نینگ۵۱ فایزینی اېرککلر،۴۹ فایزینی اېسه عیاللر تشکیل اېتهدی.
شونینگدېک، باشقرمه معلوماتیگه کۉره، اهالی نینگ قریب ۷۰ فایزی یاکه۲۶ میلیون نفری قیشلاقلرده،۲۶ فایزی یاکه۹.۸ میلیون نفری شهرلرده استقامت قیلهدی. ینه۴فایز، یعنی۱.۵ میلیون نفرینی کۉچمنچی (کۉچی) اهالی تشکیل اېتهدی.
احصائیه باشقرمهسی کابلنی۶.۴میلیون اهالی بیلن مملکت نینگ اېنگ گوجوم ولایتی، هراتنی اېسه۲.۴میلیون اهالی بیلن ایکّینچی اۉریندهگی ولایت دېب کۉرسهتگن.
مذکور اداره اۉتگن ییلی افغانستان اهالیسینی۳۶.۴میلیون نفر دېب بهالهگن اېدی. اونگه کۉره، سۉنگگی بیر ییل ایچیده مملکت اهالیسی ۲.۲فایزگه یاکه قریب۸۰۰ مینگ نفرگه آشیب،۳۷.۲میلیونگه یېتگن.
بیرلشگن ملتلر تشکیلاتی و طالبان تامانیدن اعلان قیلینگن بو تورلی احصائیهلر افغانستانده حاضرگچه کېنگ قمراولی و شفّاف اهالینی رۉیخطگه آلیش ایشلری اۉتکزیلمهگن بیر پیتده اعلان قیلینماقده.
