اسلام همکارلیک تشکیلاتینینگ اسلام آبادده اۉتکزیلگن عیاللر ایشلری وزیرلرینینگ تۉقّیزینچی ییغیلیشی بوگون (دوشنبه، ۲۲سرطان) بیر قطعنامه و یکوني اعلامیه قبول قیلینیشی بیلن اۉز ایشینی یکونلهدی.
ییغیلیش قطعنامهسیده اشتراکچیلر افغانستانده قیزلرنینگ تعلیم آلیشی و عیاللرنینگ ایش قیلیش امکانیتلری تۉختهتیلگنیدن چوقور افسوس و تشویش بیلدیرگن. اولرنینگ تأکیدلشیچه، بوندهی چارهلر اسلام نینگ ماهیتی و آبروسیگه پوتور یېتکزهدی.
اولر «افغانستان جمعیتیده برچه عیاللر و قیزلرنینگ اسلامي قدریتلر و تمایللرگه موافق، تېنگ همده کمسیتیشسیز جماعت حیاتیده اشتراک اېتیشینی تأمینلش» مهملیگینی قید اېتگن.
ییغیلیش اشتراکچیلری یکوني اعلامیهده هم تعلیم و ایشلشگه قۉییلگن تعقیقنی بېکار قیلیش، شونینگدېک، برچه عیاللر و قیزلرنینگ اسلامي قدریتلر اساسیده جماعت حیاتیده تۉلیق، تېنگ و مضمونلی اشتراکینی تأمینلش ضرورلیگینی تأکیدلهگن.
اسلام همکارلیک تشکیلاتینینگ عیاللر ایشلری وزیرلرینینگ تۉقّیزینچی کنفراسی تیناوون اسلام آبادده۷۵اعضا دولت وکیللری اشتراکیده باشلنگن اېدی.
کنفراسدن ترقهلگن صورتلرده باشقه دولتلر بیراقلری قطاریده افغانستان نینگ اوچ رنگلی بیراغی هم کۉرینگن. بیراق، کۉرینیشیچه، اوشبو ییغیلیشده افغانستان نامیدن هېچ بیر نماینده قتنهشمهگن.
طالبلر افغانستانده حاکمیتنی قَیته اېگهلهگنیدن بویان عیاللر و قیزلرنینگ اساسي حقوق همده اېرکینلیکلریگه کېنگ کۉلملی چېکلاولر جاري اېتیب، اولرنینگ تعلیم آلیشی و ایشلشینی تعقیقلهگن.
اسلام همکارلیک تشکیلاتی و باشقه قطار اسلامي مؤسسهلر بو چېکلاولرنی بیر نېچه بار تنقید قیلیب، اولرنی بېکار قیلیشگه چقیرگن. بیراق طالبلر حاضرگچه بو چقیریقلرگه عمل قیلمهگن.
