بیرلشگن ملتلر تشکیلاتینینگ انسانپرورلیک مسألهلرنی موافقلشتیریش ادارهسی (اوچا) افغانستان عیاللری و قیزلری ساغلیقنی سقلش خدمتلریدن فایدهلنیشده تاباره آرتیب بارهیاتگن تۉسیقلرگه دوچ کېلهیاتگنینی معلوم قیلدی.
آچه بوگون (سهشنبه، ۲۳-سرطان) نشر قیلگن بیاناتیده وضعیت ینه-ده یامانلشیش خوفی آستیده اېکنینی تأکیدلهدی.
تشکیلاتگه کۉره، طالبلرنینگ عیاللر و قیزلرنینگ تعلیم آلیشی، ایشلشی همده اېرکین حرکتلنیشیگه قۉیگن چېکلاولری اوشبو وضعیت نینگ اساسي سببلریدن بیریدیر.
بیاناتده ایتیلیشیچه، قیزلر تعلیمیگه قۉییلگن تعقیقلر دوام اېتر اېکن، انسانپرورلیک تشکیلاتلری کېلهجکده عیال شفاکارلر، نرسلر و دایهلر یېتیشماوچیلیگی یوزهگه کېلیشیدن تاباره کۉپراق خواطر بیلدیرماقده.
یونیسف گزارشیگه کۉره، اگر عملدهگی چېکلاولر سهقلنیب قالسه، افغانستان 2030-ییلگچه 25 مینگدن آرتیق عیال اۉقیتووچی و طبیات خادیمیدن اَیریلهدی.
اوچا نینگ تأکیدلشیچه، ساغلیقنی سقلش تیزیمی نهفقط طالبلر چېکلاولری، بلکه عیال طبیات خادملری تنقیصلیگی، مالیهلشتیریش نینگ قیسقریشی، ضرور دارو-درمانلر نینگ یېتیشمسلیگی، شاشیلینچ توغروق خدمتلریدهگی اوزیلیشلر همده آنهلر و چقهلاقلرنینگ آلدینی آلیش ممکن بۉلگن اۉلیملری، اینیقسه قیشلاق حدودلریده، کبی معمالرگه هم دوچ کېلماقده.
تشکیلات معلوماتیگه کۉره، عیاللر و قیزلر افغانستاندهگی انسانپرورلیک بحراندن اېنگ کۉپ ضرر کۉرهیاتگن قتلم بۉلیب قالماقده. جاري ییلده۱.۷میلیوندن آرتیق عیال و قیز گومانیتار یاردمگه محتاج.
بامياندهگی عیاللر سلامتلیگی
اوچا عیاللر سلامتلیگی تیزیمی اینیقسه آغیر باسیم آستیده اېکنینی قید اېتدی. افغانستان هنوز دنیاده آنهلر اۉلیمی اېنگ یوقاری بۉلگن مملکتلردن بیری حسابلنهدی.
بیرلشگن ملتلر تشکیلاتی حساب-کتابیگه کۉره، ۲۰۲۴-ییلده هر ۱۰۰ مینگ تیریک توغروققه ۶۳۸ ته آنه اۉلیمی تۉغری کېلگن. بو آسیادهگی اېنگ یوقاری کۉرستکیچ و دنیا بۉییچه یېتّینچی اېنگ یوقاری درجهدیر.
اوچا مثال طریقهسیده افغانستان مرکزیدهگی باميان ولایتیدهگی آغیر وضعیتگه اعتبار قرهتدی.
تشکیلاتنینگ ایتیشیچه، باميان مرکزي شفاخانهسی مرکزي تاغلی حدودلردهگی اېنگ مهم طبیات مؤسسهلریدن بیری بۉلیب، ولایتده ینگی توغیلگن چقهلاقلر اوچون خدمتیگه اېگه یگانه شفاخانه حسابلنهدی.
مذکور شفاخانه اوزاق قیشلاقلرده یشاوچی، حاملهدارلیک یاکه توغروق پیتیده اسارتگه اوچرهگن عیاللر اوچون سۉنگی مراجعت مسکنی حسابلنهدی. مخصوص پرورشگه محتاج چقهلاقلر اوچون اېسه ولایتده باشقه جهازلنگن طبیات مرکزی موجود اېمس.
اوچا نمایندهسی شفاخانه خادملری و ساغلیقنی سقلش ساحهسیدهگی همکارلر بیلن اوچرهشوو دوامیده اوشبو مؤسسه آنه و باله سلامتلیگی بۉییچه ضرور خدمتلرنی سقلب قالیش اوچون کتّه باسیم آستیده ایشلهیاتگنینی کوزهتگن.
شفاخانه خادملری کۉپلب عیاللر شفاخانهگه فقط آغیر اسارتلر یوزهگه کېلگنیدن کېینگینه یېتیب کېلهیاتگنینی بیلدیرگن.
اوچاگه کۉره، باميان نینگ قیشلاق حدودلریده یشاوچی عیاللر شاشیلینچ و توغروق خدمتلریدن فایدهلنیش اوچون یراقسیز یۉللرده بیر نېچه ساعت یۉل باسیشگه مجبور.
ولایتدهگی یگانه جهازلنگن شفاخانهنینگ اوزاقلیگی و امکانیتلری چېکلنگنی سببلی، باميان عیاللرینینگ اکثریتی شفاکارگه فقط فوق العاده حالتلرده و کېچیکیب مراجعت قیلماقده.
