بیرلشگن ملتلر تشکیلاتینینگ افغانستاندهگی یاردم ادارهسی (یوناما) بنگلادشلیک دیپلومات رباب فاطمه اوشبو اداره باشلیغی اېتیب تعیینلنگنینی رسماً اعلان قیلدی.
اوّلراق رباب فاطمه بیرلشگن ملتلر تشکیلاتی باش کاتبینینگ افغانستان بۉییچه مخصوص وکیلی و یوناما باشلیغی اېتیب تعیینلنگنی حقیده خبرلر ترقهلگن اېدی.
یونامانینگ بوگون، پنجشنبه، ۲۵-سرطان، نشر قیلگن بیاناتیده، بیرلشگن ملتلر تشکیلاتی باش کاتبی آنتونیو گوترش تیناوون رباب فاطمهنینگ ینگی مخصوص وکیل اېتیب تعیینلنگنینی رسماً معلوم قیلگنینی بیلدیردی.
فاطمه بو لوازمده قیرغیزستانلیک رزا اوتونبایوانینگ اۉرنینی اېگهلهدی. او طالبلر حاکمیتگه قَیتگنیدن بویان بیرلشگن ملتلر تشکیلاتی باش کاتبینینگ افغانستان بۉییچه مخصوص وکیلی و یوناما باشلیغی اېتیب تعیینلنگن ایکّینچی عیال حسابلنهدی.
یوناما معلوماتیگه کۉره، رباب فاطمه ملي و خلقارا دولت خدمتی، ایکّی و کۉپ تامانلهمه دیپلوماتيک، سیاست ایشلب چیقیش، حقوق حمایهسی همده دستورلرنی ایشلب چیقیش و عملگه آشیریش ساحهلریده۳۰ ییلدن آرتیق تجربهگه اېگه.
یوناما رهبرلیگیدن آلدین او بیرلشگن ملتلر تشکیلاتی باش کاتبی اۉرینباسری و بیرلشگن ملتلر تشکیلاتینینگ اېنگ کم رواجلنگن مملکتلر، دېنگیزگه چیقیش یۉلیگه اېگه بۉلمهگن رواجلنهیاتگن دولتلر همده کیچیک آرال رواجلنهیاتگن دولتلر بۉییچه عالي وکیلی لوازمیده فعالیت یوریتگن.
شونینگدېک، او ۲۰۲۲-۲۰۱۹-ییللرده بنگلادشنینگ بیرلشگن ملتلر تشکیلاتیدهگی دایمي وکیلی، اوندن آلدین اېسه بنگلادشنینگ جاپاندهگی اېلچیسی بۉلیب ایشلهگن.
