افغانستاننینگ بیرلشگن ملتلر تشکیلاتیدهگی، اوّلگی حکومت تعیینلهگن دیپلوماتلر تامانیدن باشقریلهیاتگن دایمي نمایندهلیگی بنگلادشلیک دیپلومات رباب فاطمهنینگ بیرلشگن ملتلر تشکیلاتی باش کاتبینینگ افغانستان بۉییچه ینگی مخصوص وکیلی و یوناما باشلیغی اېتیب تعیینلنگنینی آلقیشلهدی.
نمایندهلیک بیاناتیده رباب فاطمهنینگ بای دیپلوماتیک تجربهسی، کۉپ تامانلهمه همکارلیکدهگی فعالیتی و بیرلشگن ملتلر تشکیلاتی تیزیمیدهگی تصدیقلنگن رهبرلیک صلاحیتی افغانستان اوچون مهم باسقیچده علیحده اهمیت کسب اېتیشی تأکیدلنگن.
بیاناتده قید اېتیلیشیچه، رباب فاطمه بو لوازمنی بیرلشگن ملتلر تشکیلاتی خوفسیزلیک کېنگشی یوناما مدتینی اوزهیتیریب، اداره فعالیتینی استراتژیک قَیته کۉریب چیقیش جریانینی باشلهگن بیر پیتده قبول قیلماقده. وکالتخانه بو جریان یوناما ثمرهدارلیگینی آشیریش، اونینگ استراتیژیک یۉنهلیشینی کوچهیتیریش و اداره فعالیتینی افغانستان خلقینینگ اۉزگریب بارهیاتگن احتیاجلری همده اوستوار یۉنهلیشلریگه ماسلشتیریش اوچون مهم امکانیت اېکنینی بیلدیردی.
وکالتخانه یوناما رباب فاطمه رهبرلیگیده اۉز وظیفهلرینی، خالص و ثمرهلی طرزده دوام اېتتیریشیگه ایشانچ بیلدیرگن. جملهدن:
مضمونلی سیاسي ملاقاتلرنی رواجلنتیریش؛ افغانلر رهبرلیگی و اېگهلیگیگه اساسلنگن اینکلیوزیو سیاسي جریاننی قۉللب-قوّتلش؛
منطقوي ملاقات و همکارلیکنی مستحکملش؛ انسانپرورلیک یاردمینی موافقلشتیریش؛ تینچ اهالینی حمایه قیلیش؛ انسان حقوقلری حالتینی مانیتورینگ قیلیش و حسابات بېریش؛ برچه افغانستان فقرالری نینگ، اینیقسه عیاللر و قیزلر نینگ حقوق همده اساسي اېرکینلیکلرینی تیکلش و حمایه قیلیش بۉییچه سعی-حرکتلرنی دوام اېتتیریش.
نمایندهلیک، شونینگدېک، بیرلشگن ملتلر تشکیلاتینینگ افغانستان بیلن برچه علاقهلری بیرلشگن ملتلر تشکیلاتی خوفسیزلیک کېنگشی قطعنامهلریگه موافق پرینسپیال و شرطلرگه اساسلنگن بۉلیب قالیشی، وکیللیک اساسیدهگی، قانوني و حسابدار سیاسي تیزیمنی برپا اېتیشگه خدمت قیلیشی کېرهکلیگینی تأکیدلهدی.
بیاناتده ینه شوندهی دېییلهدی: “انسان حقوقلری، اینیقسه عیاللر و قیزلر حقوقلری، اینکلیوزیو باشقروو همده خلقارا مجبوريتلرگه رعایه اېتیش بارهسیده حقیقي، مضمونلی و قَیتریب بۉلمهیدیگن ترقیات بۉلمهگن تقدیرده، بیرلشگن ملتلر تشکیلاتینینگ افغانستان بیلن علاقهلری طالبان حاکمیتینی عادتيلشتیریشگه آلیب کېلمسلیگی کېرهک.”
نمایندهلیک یوناما نینگ افغانستاندهگی فعالیتینی قۉللب-قوّتلشینی همده ینگی رهبر رباب فاطمه بیلن همکارلیک قیلیشگه تیارلیگینی معلوم قیلدی.
بیرلشگن ملتلر تشکیلاتی باش کاتبی یقینده رباب فاطمهنی افغانستان بۉییچه مخصوص وکیلی و یوناما باشلیغی اېتیب تعیینلهگن اېدی. او قیرغیزستانلیک دیپلومات رزا اوتنبایوا نینگ اۉرنینی اېگهلهدی. رزا اوتنبایوا، نینگ وکالتی ۲۰۲۵ییل سپتامبر آییده یکونلنگنیدن سۉنگ، یوناما نینگ سیاسي مسألهلر بۉییچه اۉرینباسری جورجت گانیون وقتینچه باشقریب کېلهیاتگن اېدی.
