خبرلرگه کۉره، بدخشان ولایتینینگ یفتل پایین اولسواللیگی بیر نېچه ساعت دوامیده طالبلر نظارتیدن چیقیب، ینگی تشکیل اېتیلگن «سپاهيان میهن» جبههسی کوچلری قۉلیگه اۉتگن.
اجتماعي ترماقلرده ترقهلگن ویدیو و صورتلرده یفتلی پایین اولسواللیگی حاکملیگی بناسی اوستیده طالبان بیراغی اۉرنیگه کۉک رنگلی بیراق هیلپیرهب تورگنی کۉرینهدی. تصویرلرده آتیشمهلر و قوراللی تۉقنهشوولر آوازی هم اېشیتیلهدی.
محلي منبعلرنینگ یېتکرمهلرگه معلوم قیلیشیچه، «سپاهيان میهن» جبههسی اعضالری بوگون (جمعه، ۲۶-سرطان) تانگده کوتیلمهگن هجوم اویوشتیریب، یفتل پاییندهگی اولسواللیک حاکملیگی، طالبلرنینگ امنیه قوماندانلیگی و استخبارات ادارهلریگه هجوم قیلگن. اولر اولسواللیک مرکزینی بیر نېچه ساعت نظارت قیلگن، سۉنگ طالبلرنینگ قورال-اسلحهلرینی آلیب، منطقهنی ترک اېتگن.
بیر منبعنینگ اطلاعات روزگه بېرگن معلوماتیده، «سپاهيان میهن» جبههسی اعضالری یفتل پایین اولسواللیگینی اېگهلهگنینی و حاضر هم طالبلر بیلن جنگلر دوام اېتهیاتگنینی ایتدی.
منبع نینگ سۉزلریگه کۉره، اوشبو جبههگه عبدالقیوم ملنگ قوماندانلیک قیلماقده. ایتیلیشیچه، عبدالقیوم ملنگ سابق حکومتنینگ مخصوص کوچلری صفیده خدمت قیلگن.
حاضرچه «سپاهيان میهن» جبههسی حقیده قۉشیمچه معلومات موجود اېمس. بو جبهه تامانیدن طالبانگه قرشی عملگه آشیریلگن ایلک حربي هجوم حسابلنهدی.
طالبلرنینگ بدخشاندهگی محلي رسميلری حاضرچه بو خبرلرگه مناسبت بیلدیرمهگن.
اگر اوشبو خبرلر تصدیقلنسه، بو سۉنگّی بېش ییل ایچیده بیرینچی مرته بیر اولسواللیک باشقرووی طالبلر نظارتیدن چیققن حالت بۉلهدی.
طالبلر اۉزیگه قرشی قوراللی قرشیلیک موجودلیگینی انکار اېتهدی. بیراق بیر نېچه قوراللی جبههلر وقتی-وقتی بیلن طالبلر کوچلریگه قرشی هجوملری اویوشتیریلگنی حقیده بیانات بېریب کېلماقده.
