افغانستاننینگ بیرلشگن ملتلر تشکیلاتی انسان حقوقلری کېنگشیدهگی وکیلی نصیر احمد اندیشه “سپاهيان میهن جبهه”سینینگ بدخشان ولایتی یفتل پایین اولسواللیگی مرکزیگه اویوشتیرگن هجومینی قۉللب-قوّتلهدی.
اندیشه ایکس اجتماعي ترماغیده نشر قیلگن بیاناتیده اوشبو حرکتنی «ظلمگه قرشی سکوتنی بوزگن ندا» دېب اتهدی.
اونینگ ایتیشیچه، «بوگون ینه هندوکوش بغریدن، کورهشچیلر یورتیدن قرشیلیک آوازی ینگرهماقده.»
اندیشهنینگ قۉشیمچه قیلیب ایتیشیچه، بدخشاندهگی واقعهلر ظلم و اسارت بو یورتده ایلدیز آته آلمهسلیگینی نمایان اېتگنینی تأکیدلهدی.
او “سپاهيان میهن جبهه”سی نامینی تیلگه آلمهگن حالده شوندهی دېدی:
«بوگونگی ندا – ظلمگه قرشی سکوتنی بوزیش نداسیدیر. تاریخ بو فداکارلیکلرنی البته قید اېتهدی.»
بیرلشگن ملتلر تشکیلاتی انسان حقوقلری کېنگشیدهگی افغانستان نمایندهسی طالبلر بیلن همکارلیکنی «شرمندهلیک» و «عار-ناموسنی ساتیش» دېب بهالهدی. او اوشبو گروه بیلن مُراضات و همکارلیکدن امید قیلیشنی «بېهوده امیدگه بېریلیش» همده «غفلت اویقوسیده قالیش» دېیه تعریفلهدی.
“سپاهيان میهن جبهه”سی قوماندانی عبدالقَیوم ملنگ، سابق جمهوریت اوردوسی اعضاسی، جمعه کونی (۲۶-سرطان) تانگیده بدخشان نینگ یفتل پایین تومنیگه هجوم اویوشتیردی. جبهه نینگ جنگچیلری تومن مرکزینی بیر نېچه ساعت دوامیده طالبان نظارتیدن چیقریب، اداری بنا اوستیگه اۉز بیراغینی اۉرنتگن.
مرکزنی قَیتریب آلیش اوچون طالبان حدودگه قوروقلیک و هوا کوچلرینی یوباردی. شونینگدېک، طالبان اوردوسی باشلیغی فصیح الدین فطرت هم یفتل پایین مرکزیگه بارگن.
طالبان “سپاهيان میهن جبهه”سی نینگ بیر نېچه اعضاسی قۉلگه آلینگنینی ادعا قیلماقده. بیراق سابق پارلمان وکیلی فوزيه کوفی نینگ ایتیشیچه، طالبلر اوشبو واقعهگه علاقهسی بۉلمهگن تینچ اهالینی، جملهدن بالهلرنی هم حبسگه آلگن.
