افغانستان سابق باشقرهلاوچیسی محمد فرید حمیدی بدخشان ولایتینینگ یفتل پایین اولسواللیگی «سپاهيان میهن» (جبهه)سی تامانیدن اېگهللنگنی طالبلرنینگ مغلوب اېتیب بۉلمسلیگی حقیدهگی افسانهنی یۉققه چیقرگنینی ایتدی.
حمیدی اوشبو واقعهگه مناسبت بیلدیریب نشر قیلگن بیاناتیده شوندهی دېدی: «یفتل پایین اولسواللیگینینگ اېگهللنیشی دوحه شرمندهلی کېلیشووی آرقهلی، قانوني یۉل بیلن اېمس، حاکمیتگه کېلگن طالبلرنینگ بوتون مملکت اوستیدن حکمرانلیک قیلهیاتگنی و مغلوب اېتیب بۉلمهیدی دېگن افسانهسینی برباد قیلدی.»
اونینگ ایتیشیچه، اوشبو واقعه اوچته مهم سبقنی نمایان اېتدی.
حمیديگه کۉره، بیرینچی سبق شوندهکی، «سپاهيان میهن» (جبهه)سی نینگ طالبلر قۉلیدن ایلک بار بیر اولسواللیک مرکزینی اېگهللشی «حقوقبوزرلیک، سیاسي و اېتنیک حاکمیت، کمسیتیش، استبداد همده زۉرآورلیککه تهیهنگن باشقروو اوزاق دوام اېتمسلیگی»نی اثباتلهدی.
سابق باشقرهلاوچینینگ تأکیدلشیچه، ایکّینچی سبق شوندهکی، قوراللی کورهش هم «قانوني و قدریتلرگه اساسلنگن» بۉلیشی ممکن.
او شوندهی دېدی: «سۉنگّی اېلّیک ییللیک قوراللی ماجرالر دوامیده برچه تامانلر اساسن انساني، اینیقسه تینچ اهالی تلفاتینی کۉپهیتیریش و جماعت آستقورمهسینی ویران قیلیشگه اعتبار قرهتگن اېدی. اما یفتلی پایین تومنینی اېگهللش چاغیده فقط حربي نشانلرگه ضربه بېریلدی.»
حمیدينینگ ایتیشیچه، اوچینچی مهم خلاصه شوکی، «حاکم گروه اۉزینینگ ظالمانه، ناقانوني و کمسیتیشگه اساسلنگن حکمرانلیگینی ابدي سقلب قاله آلمهیدی».
او افغانستان معماسینینگ یېچیمی «اۉزارا کېلیشوو، بیر-بیرینی تن آلیش، اجتماعي عدالت، کمسیتیشنی برطرف اېتیش، عیاللر و اېرککلرنینگ شأنی همده قدر-قیمتیگه حرمت و برچه یشاوچیلرنینگ اېرکین، تېنگ حقوقلی حاکمیتینی تأمینلش» آرقهلی تاپیلیشینی تأکیدلهدی.
«سپاهيان میهن» (جبهه)سینینگ بدخشاندهگی یفتل پایین اولسواللیگی مرکزیگه اویوشتیرگن هجومی و تومن مرکزینی بیر نېچه ساعت طالبان نظارتیدن چیقریشی کېنگ جماعتچیلیکده تورلی مناسبتلرگه سبب بۉلدی. سابق حکومت نینگ اَیریم عملدارلری بو حرکتنی قۉللب-قوّتلهگن بۉلسه، طالبلر اعضالری و اولرنینگ طرفدارلری واقعه اهمیتینی کمهیتیریشگه اورینماقده.
طالبلر اوردوسی باشلیغی فصیح الدین فطرت اېسه هجومدن سۉنگ یفتل پایین اولسواللیگیگه باریب، ژورنالیستلرگه هجومنی عملگه آشیرگنلر اۉز مقصدیگه اېریشه آلمهگنینی معلوم قیلگن.
