محلي منبعلرنینگ معلوم قیلیشیچه، غزنی ولایتینینگ قرهباغ اولسواللیگیدهگی محلي بویوکلردن بیری قادر علی رفعتنینگ جسدی بیر کېچه-کوندوز بېدرَک یۉقالگنیدن سۉنگ تاپیلگن.
منبعلرگه کۉره، قادر علی رفعت پنجشنبه کونی (۲۵-سرطان) قرهباغ اولسواللیگینینگ «شاکی نوکه» قیشلاغیدهگی اوییدن تنباکو بازاری تامان یۉل آلگن، بیراق یۉلده بېدرَک یۉقالگن.
محلي اهالی بیر کون دوام اېتگن قیدیروولردن سۉنگ اونینگ قانگه بېلنگن جسدینی جمعه کونی (۲۶-سرطان) «خرمون گُل» منطقهسیدن تاپگن.
منبعلر بېرگن معلوماتلرگه کۉره، اوشبو قوم بویوکینینگ جسدی بیرینچیدن «زردالو» حدودیدهگی طالبان نظارت پوستهسیگه قرهباغ اولسواللیگی امنیه قوماندانلیگیگه آلیب باریلگن. کېینچهلیک طب عدلی اۉتکزیش اوچون غزنی ولایتی مرکزیگه یوباریلگن.
طب عدلی یکونلنگچ، قادر علی رفعت نینگ جسدی قرهباغ اولسواللیگی «شاکی نوکه» قیشلاغیده دفن اېتیلگن.
حاضرچه اوشبو قاتللیکنینگ سببلری و اونی صادر اېتگن شخصلر نامعلوم. طالبلرنینگ غزنیدهگی محلي رسميلری هم واقعه یوزهسیدن ایضاح بېرمهگن.
طالبلر افغانستانده حاکمیتنی قَیته اېگهلهگنیدن بویان مملکتنینگ تورلی ولایتلریدن کۉپلب سِرلی قاتللیکلر حقیده خبرلر ترقهلگن.
اکثریت حاللرده بو قاتللیکلر «نامعلوم قوراللی شخصلر»گه نسبت بېریلگن بۉلسه-ده، طالبلر اولرنی انیقلش و جوابگرلیککه تارتیش سِرلی قاتللیک: غزنیده محلي آقسقال نینگ جسدی تاپیلدیحقیده کمدن-کم حاللرده معلومات بېرگن.
