افغانستاننینگ بیرلشگن ملتلر تشکیلاتیدهگی نمایندهلیگی سرپرستی نصیراحمد فایق، طالبان تامانیدن «حجابگه رعایه قیلمهگنلیک» بهانهسی بیلن حبسگه آلینگن اَیریم عیاللر و قیزلر جنسي همده جسماني زۉروانلیککه اوچرهگنی حقیده حجتلشتیریلگن و دهشتلی گزارشلر موجودلیگینی ایتدی.
فایق بوگون، یکشنبه (۲۸-سرطان) ایکس اجتماعي ترماغیده نشر قیلگن بیاناتیده، طالبلرنینگ حاکمیتنی سوءاستعمال قیلیشی چوقور تشویش و افسوس اویغاتهیاتگنینی بیلدیردی.
او شوندهی یازدی: «افغانستاننینگ تورلی ولایتلریدن، اینیقسه هراتدن، طالبان استخباراتی و «امر به معروف» ادارهسی نینگ اَیریم خادملری تامانیدن صلاحیتلرنی سوءاستعمال قیلیشگه عاید کۉپلب حجتلشتیریلگن و دهشتلی گزارشلر نشر قیلیندی. بو حالتلر چوقور تشویش و افسوس اویغاتماقده.»
فایقنینگ ایتیشیچه، اوشبو گزارشلرگه کۉره، بیر قطار عیاللر و قیزلر حجابگه رعایه قیلمهگنلیک بهانهسی بیلن حبسگه آلینیب، حبس وقتیده جسماني و جنسي زۉرآورلیککه دچار بۉلگن.
او، شونینگدېک، اَیریم عیاللر و اولرنینگ عایلهلری مجبوري نکاحنی قبول قیلیشگه باسیم اۉتکزیلگنی حقیدهگی خبرلر هم ترقهلگنینی قید اېتدی.
نصیر احمد فایق شوندهی سوال قۉیدی: «خوفسیزلیک و عدالتنی تأمینلهیاتگنینی دعوا قیلهیاتگن طالبلر رهبریتی اۉز کوچلری نینگ بو خطی-حرکتلریدن بېخبرمی یاکه بوندهی ایشلر اولر نینگ کۉرستمهسی و راضیلیگی بیلن عملگه آشیریلماقدهمی؟»
اونینگ تأکیدلشیچه، بوگونگی کونده طالبلرنینگ عملیاتی و خطی-حرکتلری عدالت، قانون اوستوارلیگی همده اۉزلری رعایه قیلهیاتگنینی دعوا قیلهدیگن قدریتلردن آچیقچهسیگه ییراقدیر.
فایق طالبلر اعضالرینینگ جزادن قوتولیب قالیش مدنیتی دوام اېتهیاتگنیدن آگاهلنتیریب، شوندهی دېدی: «فقط عادي فقرالرگه نسبتاً قۉللنهیاتگن تنلب جزالش اصولی نهفقط طالبان تیزیمیده عدالت یۉقلیگینی کۉرسهتهدی، بلکه طالبلر نینگ اساسسیز دعوالریگه نسبتاً جماعتچیلیک ایشانچسیزلیگینی ینه-ده کوچهیتیرهدی و نتیجهده خلق نینگ غضبی همده ناراضیلیگینی آشیرهدی.»
بوندن آلدین بیرلشگن ملتلر تشکیلاتینینگ افغانستان بۉییچه انسان حقوقلری مخصوص گزارشگلری ریچارد بنت ۲۰۲۴-ییل جنوری آییدهگی گزارشیده حجاب بهانهسی بیلن حبسگه آلینگن اَیریم عیاللر طالبان قماقخانهلریده جنسي تجاوزگه اوچرهگنینی تصدیقلهگن اېدی.
سۉنگگی تۉلقینده اېسه طالبان ۱۶-جوزادن باشلب اۉزلری بېلگیلهگن کيینیش قاعدهلریگه رعایه قیلمهگنلیک بهانهسی بیلن عیاللر و قیزلرنی حبسگه آلیشنی باشلهدی. ۱۹-جوزا کونی هراتنینگ غربیدهگی جبریل منطقهسی اهالیسی اوشبو عملیاتگه قرشی ناراضیلیک نمایشی اۉتکزدی، بیراق نمایش زۉرآورلیک بیلن باستیریلدی.
شوندن کېین عیاللر و قیزلرنینگ کيینیش اسلوبی بهانهسیده حبسگه آلینیشی همده طالبلر حبسخانهلریده اولرگه نسبتاً تضییق و زۉرآورلیکلر دوام اېتهیاتگنی حقیده کۉپلب خبرلر ترقهلدی.
شونینگدېک، اَیریم عایلهلر قیزلرینی طالبلر قۉلیدن آزاد قیلیش اوچون گروه قاعدهلریگه رعایه قیلیش حقیده یازمه مجبوريت و کفالت تقدیم اېتیشگه مجبور بۉلگنلیکلرینی بیلدیرگن.
