«افغانستان آزادلیک جبههسی» سیاسي دفتری باشلیغی داوود ناجي طالبلر باشپناه تۉغریسیدهگی قانون لایحهسی آرقهلی مملکتدهگی خارجي جنگریلر فعالیتیگه حقوقي نقاب یرهتیشگه اورینهیاتگنینی ایتدی.
ناجي دوشنبه کېچهسی (۲۹-سرطان) ایکس اجتماعي ترماغیده نشر قیلگن بیاناتیده، اوشبو قانون افغانستاننی «ترورچیلر و خلقارا جنایتچیلر اوچون خوفسیز مسکن»گه ایلنتیریشینی تأکیدلهدی.
اونینگ سۉزلریگه کۉره، طالبان باشپناه قانونی آرقهلی مینگلب خارجي جنگریلر، جملهدن القاعده، شرقي تورکستان حرکتی، اویغور جنگریلری و باشقه خلق ارا ترورچی گروهلر اوچون قولهی شرایط یرهتماقچی.
ناجي، «بو قانون افغانستاننی برچه ترورچیلر و خلقارا جنایتچیلر اوچون خوفسیز جایگه ایلنتیرهدی»، دېدی.
آلدینراق طالبلرنینگ قاچقینلر ایشلری بۉییچه وزیرلیگی افغانستانده «باشپناه تۉغریسیدهگی قانون» لایحهسی تیارلنگنینی معلوم قیلگن اېدی.
وزیرلیک اۉتگن هفته چهارشنبه (۲۴-سرطان) نشر قیلگن بیاناتیده لایحه قاچقینلر وزیرلیگی، تشقی ایشلر، ایچکی ایشلر، عدلیه وزیرلیکلری، طالبان استخباراتی و عالي محکمهسی همکارلیگیده ایشلب چیقیلگنینی بیلدیرگن.
طالبلرنینگ قاچقینلر وزیری اۉرین باسری عبدالرحمن راشد قانونده «شریعت و اسلامي حقوقلر، باشپناه سۉرهش حقوقی همده قاچقینلرنی حمایه قیلیش» نظرده توتیلگنینی ایتگن.
بیراق مذکور قانون حاضرچه طالبان رهبری تامانیدن تصدیقلنمهگن و اونینگ تۉلیق مضمونی حلی اعلان قیلینمهگن.
افغانستانده خارجي جنگریلر موجودلیگی مملکت یشاوچیلری، قۉشنی دولتلر و خلق ارا همجمعیتنینگ اساسي خواطرلریدن بیری بۉلیب قالماقده.
طالبلر بوندهی جنگریلر بارلیگینی انکار اېتهیاتگن بۉلسه-ده، امریکانینگ افغانستاننی قَیته تیکلش بۉییچه مخصوص بازرسی (سیگار) اۉزی نینگ سۉنگگی حساباتلریدن بیریده اولرنینگ موجودلیگینی تصدیقلهگن اېدی.
۱۴۰۴-هجري قویاش ییلی نینگ اسد آییده اعلان قیلینگن سیگار گزارشیگه کۉره، «داعش-خراسان» صفیده قریب۲ مینگ، «تحریک طالبان پاکستان» (تیتیپی) صفیده 6 مینگدن آرتیق جنگری موجود. القاعده نینگ اېسه ۳۰-۶۰نفر اساسي اعضاسی و ۱۲ نفر یوقاری مرتبهلی رهبری افغانستانده اېکنی قید اېتیلگن.
