افغانستان سابق اوردوسی قوماندانلریدن بیری و «افغانستان بیرلشگن جبههسی» باشلیغی سمیع ساداتنینگ ایتیشیچه، طالبلر حاکمیتنی اېگهلهگنیدن بویان سابق حربيلرگه قرشی قاتللیکلر دوام اېتماقده و فقط سۉنگگی اوچ آی ایچیده ۱۸۴ نفر سابق حربي نینگ اۉلدیریلیشی حجتلشتیریلگن.
سمیع سادات بوگون (سهشنبه،۳۰سرطان) ایکس اجتماعي ترماغیده شوندهی یازدی: «بیز فقط سۉنگگی اوچ آی ایچیده سابق حربيلر نینگ۱۸۴ ته اۉلدیریلیشی حالتینی حجتلشتیردیک. اولر نینگ کۉپچیلیگی دهشتلی قییناقلرگه هم دچار قیلینگن اېدی.»
اونینگ تأکیدلشیچه، ایران و تورکيهدن افغانستانگه قیتریلهیاتگن سابق حربيلرنینگ اۉلدیریلیش خوفی ینه-ده آرتماقده.
سادات سابق حربيلرگه نسبتاً صادر اېتیلگن «قاتللیک، قییناق و باشقه زۉروانلیکلر» اوچون مسوول بۉلگن شخصلر قانون آلدیده جواب بېریشی کېرهکلیگینی ایتدی.
سابق قوماندان، شونینگدېک: «هېچ بیر توزوم اۉز کېلهجگینی قۉرقوو و وحشيلیک آرقهلی کفالتلهی آلمهیدی»، دېدی.
او سابق حربيلرنینگ صورتلرینی نشر قیلیب، هنوز طالباننی قۉللب-قوّتلهیاتگنلرگه مراجعت قیلدی: «بو یوزلرگه قرهنگ و اۉزینگیزدن سۉرنگ: اگر اولردن بیری سیز نینگ آتهنگیز، آنهنگیز، اکهنگیز، آپهنگیز، اۉغلینگیز یاکه قیزینگیز بۉلگنیده نیمه قیلردینگیز؟»
حاضرچه طالبان حاکمیتنی اېگهلهگنیدن کېین سابق اوردو، پولیس و ملي خوفسیزلیک خادملری آرهسیده قنچه کیشی اۉلدیریلگنی حقیده انیق رسمي حسابات موجود اېمس. بیراق بیرلشگن ملتلر تشکیلاتی و انسان حقوقلری تشکیلاتلری طالبان تامانیدن سابق حربيلرگه نسبتاً قصاص آلیش حالتلری دوام اېتهیاتگنینی قیته-قیته تأکیدلب کېلماقده.
طالبلر اېسه اۉز رهبری اعلان قیلگن عمومي عفو سیاستیگه عمل قیلهیاتگنینی و سابق حربيلرنینگ اۉلدیریلیشیده اشتراکی یۉقلیگینی دعوا قیلهدی. شونگه قرهمهی، طالبلر حاکمیتگه کېلگنیگه قریب بېش ییل بۉلیشیگه قرهمهسدن، افغانستان نینگ تورلی حدودلریدن دېیرلی هر هفته سابق حربيلرنینگ حبسگه آلینیشی، سِرلی روشده اۉلدیریلیشی یاکه بېدرَک یۉقالیشی حقیده خبرلر ترقهلیشده دوام اېتماقده.
