طالبلرنینگ حج و اوقاف وزیرلیگی مملکتدهگی ساوچیلیک، اونشتیروو و تۉی مراسملریدهگی عرف-عادتلرنی شبهه آستیگه آلیب، اَیریم مراسملرنی، جملهدن، ساوچیلیک پیتیده قیز و ییگیت نینگ تنیشیشینی، اونشتیرووده اوزوک المشیشنی و خینه کېچهسینی، شونینگدېک، کېلین نینگ پرداز قیلیشینی حرام دېب اعلان قیلدی. شونینگدېک، اگر کېلین-کویاو تۉیده باشقهلردن بلندراق جایده اۉتیرسه، کېلین نینگ آتهسینی «دیوث» دېب اتهدی.
طالبلرنینگ حج و اوقاف وزیرلیگی بوگون (پنجشنبه، ۱ اسد) جمعه نمازی اوچون خطبه متنینی نشر قیلدی. اوشبو متن اېرتهگه مسجد اماملری تامانیدن خلق قه اۉقیب اېشیتتیریلیشی بېلگیلنگن.
مذکور خطبهده وزیرلیک ساوچیلیکدن باشلب تۉی کېچهسیگچه بۉلگن نکاح مراسملریدهگی اَیریم عرف-عادت و عنعنهلرنی «حرام» همده «منکر» دېب بهالب، اولرنی تعقیقلشگه چقیردی.
ساوچیلیکده قیز و ییگیت نینگ تنیشیشینی منع قیلینگن
طالبلرنینگ حج و اوقاف وزیرلیگی ساوچیلیک جریانیده قیز و ییگیت نینگ بیر-بیری بیلن تنیشیشی همده نکاحگه راضیلیگینی انیقلش اوچون اوچرهشیشینی «حرام» دېب اعلان قیلدی.
وزیرلیک بیاناتیده شوندهی دېییلهدی: «بعضی آدملر آرهسیده شوندهی عادت بارکی، کیمدیر بیر قیزگه ساوچی قۉیسه، قیز و ییگیت بیر-بیرینی یاقتیرهدیمی یاکه یۉقمی، بونی انیقلش اوچون اولرگه اۉزارا اخلاقی و فعل-اطوارینی یخشیراق بیلیب آلیش مقصدیده اېرکین اوچرهشیشگه رخصت بېریلهدی.»
طالبان جمعه خطبهسی متنیده بو عادت اسلام شریعتیگه ضد اېکنی و «حرام» حسابلنیشینی تأکیدلهگن.
اوزوک المشیش و خینه مراسمینی منع
طالبلر نینگ حج و اوقاف وزیرلیگی اونشتیروو کونی قیز و ییگیت نینگ اۉزارا اوزوک المشیشینی «نصرانيلر مدنیتی» دېب اتهب، بو ایشنی هم حرام دېب اعلان قیلدی.
وزیرلیک بیاناتیده شوندهی دېییلهدی: «ییگیت قیزنینگ برماغیگه اوزوک تقهدیگن، قیز هم ییگیت نینگ برماغیگه اوزوک تقهدیگن یاکه آدملر آلدیده ییگیت قیز نینگ کفیگه خینه قۉیهدیگن، قیز اېسه ییگیت نینگ کفیگه خینه قۉیهدیگن مراسملرده کۉپلب منع اېتیلگن ایشلر موجود بۉلیب، شریعت نقطهٔ نظریدن بونگه رخصت بېریلمهیدی.»
طالبلر نینگ تأکیدلشیچه، افغانستاندهگی نکاح عرف-عادتلریدن بیری حسابلنگن اوزوک المشیش و خینه مراسمی نینگ حرام دېب اعلان قیلینیشیگه سبب، قیز و ییگیت اۉرتهسیده حلی شرعي نکاح توزیلمهگنلیگی، شونینگدېک، اوزوک المشیش عادتی نصرانيلر عرف-عادتی صفتیده کېنگ ترقهلگنیدیر. طالبان بو عمللرنی «نصرانيلر مدنیتی» دېب بهالهگن.
موشکبازلیکنی تعقیقلش: «مسلماننی قۉرقیتیش حرام»
طالبلر، شونینگدېک، اونشتیروو و تۉی مراسملریده موشکبازلیک همده ترقه بازلیکنی هم حرام دېب اعلان قیلدی.
طالبلرنینگ حج و اوقاف وزیرلیگی تیارلهگن جمعه خطبهسیده ایتیلیشیچه، ترقهنی کوچلی پارتلش آوازی «بۉمبه و راکت آوازیدن کم اېمس» و بو آدملر نینگ قۉرقیشیگه سبب بۉلهدی.
خطبهده تأکیدلنیشیچه، «مسلماننی قۉرقیتیش جایز اېمس و بو حرام عمل حسابلنهدی»، شو سببلی اونشتیروو و تۉی مراسملریده موشکبازلیک همده پتاقی بازلیککه رخصت بېریلمهیدی.
پرداز، صنعي ساچ تقیش و عیاللرنینگ یوز توکلرینی آلیشنی منع قیلیش
طالبلرنینگ حج و اوقاف وزیرلیگی عیاللرنینگ پرداز قیلیشی، صنعي ساچ تقیشی همده یوز توکلرینی آلیشنی هم تعقیقلهدی.
وزیرلیک جمعه خطبهسیده ایتیلیشیچه، کېلینلرنی پرداز قیلیش اوچون آلیب باریلهدیگن گۉزللیک سالونلری «شریعتگه خلاف ایشلر عملگه آشیریلهدیگن و بوزوقلیککه زمین یرهتهدیگن مرکزلر» حسابلنهدی. اولر نینگ تأکیدلشیچه، او یېرده کېلیننی ینهده چیرایلیراق کۉرسهتیش مقصدیده «ناجایز و حرام عمللر» بجریلهدی.
طالبان، جملهدن، قاشلرنی تېریش، یوز توکلرینی یۉقاتیش یاکه قیریش، لبلرنی کتّهراق کۉرسهتیش همده بوغدایرهنگ یاکه قارهمغز عیالنی کاسمېتیکه واسطهلری یاردمیده مطلقا آق رنگلی قیلیب کۉرسهتیشنی «تدلیس، یعنی الداو و فریب» دېب اتهگن.
خطبهده، شونینگدېک، اونشتیروو مراسمیده کویاو و اونینگ عایله اعضالری قیز نینگ «حقیقي گۉزللیگی»نی کۉریشلری کېرهکلیگی تأکیدلنگن.
طالبلر نینگ حج و اوقاف وزیرلیگی ینه قۉشیمچه قیلگنیچه، اسلام پیغمبری طبيعي ساچیگه صنعي ساچ اولهیدیگن عیالنی لعنتلهگن، شو سببلی بو عمل تعقیقلنگن دېب حسابلنهدی.
یوپقه و تار کییملرنی کيیشنی تعقیقلش
طالبلرنینگ حج و اوقاف وزیرلیگی عیاللر تامانیدن یوپقه، تنه کۉرینیب تورهدیگن کییملر کيیلیشینی یلنگغاچلیک نینگ بیر کۉرینیشی دېب بهالب، بوندهی کییملرنی اونشتیروو و تۉی مراسملریده کيیشنی تعقیقلهدی.
شونینگدېک، طالبان جوده تار و تنهگه یاپیشیب تورهدیگن لباسلر همده شیملرنی افغانستاندهگی تۉی و طنطنهلرده اوچرهیدیگن منکر عادتلردن بیری دېب اتهدی.
خطبهده ینه ایتیلیشیچه، اگر بوندهی کییملرنی کيگن عیاللرنینگ عایله اېرککلری اسلام و اۉز عایلهسیدهگی عیاللرگه نسبتاً غیرت کۉرسهتمسه، بو قارهلنیشی لازم بۉلگن حالت حسابلنهدی.
رقص، موسیقی، عطر ایشلهتیش و عیاللر بیلن اېرککلرنینگ ارهلشیشینی تعقیقلش
طالبلرنینگ حج و اوقاف وزیرلیگی رقص، موسیقی، عیاللرنینگ خوشبۉی هید اوچون عطر ایشلهتیشی همده اونشتیروو و تۉی مراسملریده عیاللر بیلن اېرککلرنینگ اۉزارا صحبتلشیشینی هم حرام دېب اعلان قیلدی.
جمعه خطبهسی متنیده شوندهی دېییلهدی: «بوگونگی کونده اَیریم اونشتیروو و تۉی مراسملریده اوچرهیدیگن منکرلردن بیری عیاللر نینگ عطر ایشلهتیشیدیر. شریعتگه کۉره، عیال اویدن چیقهیاتگنده اۉزینی خوشبۉی قیلیشی جایز اېمس.» طالبان اسلام پیغمبریگه نسبت بېریلگن بیر حدیثنی کېلتیریب، «هر قندهی عیال اۉزینی خوشبۉی قیلیب چیقسه، او زناکاردیر»، دېگن مضموندهگی روایتنی تیلگه آلگن.
شونینگدېک، طالبلر قۉشیق ایتیش، رقصگه توشیش همده اونشتیروو و تۉی مراسملریده عیاللر نینگ نامحرم اېرککلر بیلن صحبتلشیشینی «منکر عمللر» دېب بهالب، اولرنی حرام اېکنینی تأکیدلهگن.
کېلین-کویاونی باشقهلردن بلندراق جایگه اۉتقزیشنی تعقیقلش: «کېلین نینگ مسوولی دیوث حسابلنهدی»
طالبلرنینگ حج و اوقاف وزیرلیگی تۉی مراسمیده کېلین و کویاونی باشقهلردن بلندراق جایگه همده برچه مهمانلر کۉز اۉنگیده یانمه-یان اۉتقزیشنی «غیرتسیزلیک و حیاسیزلیک» بېلگیسی دېب اتهب، بونی تعقیقلهدی.
مسجدلرده اۉقیلیشی بېلگیلنگن جمعه خطبهسیده شوندهی دېییلهدی: «بوگونگی کونده اَیریم اونشتیروو و تۉی مراسملریده کۉزگه تشلنهیاتگن آچیق غیرتسیزلیک و حیاسیزلیکلردن بیری – کېلین و کویاونی برچه مهمانلر کۉز اۉنگیده بلند جایگه یانمه-یان اۉتقزیشدیر.»
طالبلر بو عادتنی «اسلامي و افغانی غیرتگه ضد» دېب بهالب، بوندهی مراسملر «غرب و غیری اسلامي مدنیتگه تقلید» نتیجهسی اېکنینی تأکیدلهدی.
شونینگدېک، طالبان نینگ حج و اوقاف وزیرلیگی بوندهی حالتگه رخصت بېرگن کېلین نینگ مسوولینی «دیوث» دېب اتهب، شوندهی دېدی:
«کیم اۉز خاتینی، قیزی یاکه قرهماغیدهگی باشقه عیاللرگه نسبتاً غیرت کۉرسهتمسه و اولرنی آدملر کۉز اۉنگیده نمایش قیلسه، بوندهی شخص شرعي متنلرده دیوث دېب تعریفلنگن.»
