«افغانستان آزادلیک جبهه» و «افغانستان ملي مستقللیک جبهه» هر ایکّلهسی هم ۱۵-اسد، پنجشنبه کونی ساعت۸:۳۰ده کابل قۉنالغهسی نینگ حربي قِسمیگه هجوم اویوشتیرگنینی دعوا قیلماقده.
«افغانستان آزادلیک جبهه»سی اعلان قیلگن بیاناتیده پنجشنبه کونی کېچقورون ساعت۸:۳۰اطرافیده کابل قۉنالغهسیگه هجوم اویوشتیرگنی و طالبلرنینگ حربي تاسیساتگه «کتّه تلفات» یېتکزگنینی بیلدیرگن.
جبهه، شونینگدېک، اوشبو هجوم عاقبتیده انیق سانی نامعلوم بۉلگن بیر نېچه طالبلر اعضاسی هلاک بۉلگنی و یرهلنگنینی دعوا قیلگن.
شو بیلن بیرگه، اۉزینی «افغانستان ملي مستقللیک جبهه»سی دېب اتهیدیگن ینه بیر گروه هم عینِ وقت و عینِ جایده طالبانگه قرشی اویوشتیریلگن هجوم اوچون مسوولیتنی اۉز ذمّهسیگه آلدی.
اوشبو جبهه بیاناتیده شوندهی دېییلهدی: «جبهه نینگ جسور کوچلری بوگون کېچ ساعت۸:۳۰ده کابل قۉنالغهسیدهگی ترورچی طالبلر گروهینینگ حربي پوستهلریگه راکت هجومی اویوشتیردی.»
«افغانستان ملي مستقللیک جبهه»سی نینگ معلوم قیلیشیچه، اونینگ کوچلری طالبلرنینگ کابل قۉنالغهسیدهگی حربي پوستهلریگه تۉرتته راکت اوچیرگن. اولر نینگ دعواسیگه کۉره، هجوم عاقبتیده۱۰ کیشیدن آرتیق طالبلر اعضاسی هلاک بۉلگن، ینه اۉنلب جنگریلر یرهلنگن. بیراق، حاضرچه بو ایکّی جبهه کابل قۉنالغهسیگه بیر وقت نینگ اۉزیده علیحده هجوملر اویوشتیرگنمی یاکه بیرته هجوم اوچون ایکّیسی هم مسوولیتنی اۉز ذمّهسیگه آلگنمی، دېگن مسألهگه انیقلیک کیریتمهگن.
