طالبلر عدلیه وزیرلیگی اوشبو گروه تامانیدن «امیرلیک ملکی» دېب اعلان قیلینگن شهرچهلرده کۉچمس ملک آلدی-ساتدیسی تعقیقلنگنینی معلوم قیلدی.
وزیرلیک بوگون (شنبه، ۱۷ اسد) اعلان قیلگن بیاناتیده، مذکور شهرچهلردهگی تورر جایلر و تجارت تاسیساتلر اوچون اجاره حقی بوندن بویان طالبان ادارهسیگه تۉلهنیشی کېرهکلیگینی هم بیلدیردی.
طالبلر عدلیه وزیرلیگی بیاناتیده شوندهی دېییلهدی: «اوشبو شهرچهلردهگی تورر جای و تجارت حدودلریده ینگی بیتیملر، جملهدن اجاره شرطنامهلری، ‘بیع وفا‘، آلدی-ساتدی همده هر قندهی ینگی تصرفلر تعقیقلنهدی.»
وزیرلیک ینه شونی قۉشیمچه قیلگن: «یشاوچیلر، شخصلر و کۉچمس ملک واسطهچیلری ‘امیرلیک ملکی صفتیده قَیتریب آلینگن شهرچهلرده هر قندهی بیتیملرنی عملگه آشیریش و اولرگه واسطهچیلیک قیلیشدن قطعیاً تيیلیشلری کېرهک.»
بیاناتده ایتیلیشیچه، اوشبو شهرچهلردهگی اَیریم تورر جایلر و تجارت میدانلری ایلگری اوّلگی اېگهلر تامانیدن اجارهگه بېریلگن بۉلیب، اجارهچیلر اجاره حقینی اولرگه تۉلهب کېلگن. اېندیلیکده اېسه مذکور شهرچهلر «اسلام امیرلیگی» (طالبان) ملکی حسابلنگنی سببلی، محکمه نینگ شهرچهنی «امیرلیک ملکی» دېب تاپگن قراریدن کېین اجارهچیلر اجاره حقینی طالبان اداره سیگه تۉلهشلری شرط. اوّلگی اېگهلر اېسه اولردن اجاره پولی طلب قیلیش حقوقیگه اېگه اېمس.
طالبلر عدلیه وزیرلیگی «یېرلرنی ناقانوني اېگهللش نینگ آلدینی آلیش کمیسیونی» یقین کونلرده اجاره تۉلاولرینی عملگه آشیریش اوچون بانک حساب رقمی تفصیلاتلرینی اعلان قیلیشینی معلوم قیلدی.
طالبلر افغانستانده حاکمیتنی قَیته اېگهلهگنیدن سۉنگ مملکتنینگ تورلی ولایتلریدهگی اۉنلب تورر جای شهرچهلرینی «امیرلیک ملکی» دېب اعلان قیلگن.
جملهدن، کابل غربیدهگی «امید سبز» شهرچهسی هم «امیرلیک ملکی» دېب اعلان قیلینگن و یقینده اونینگ اهالیسیگه حدودنی بۉشهتیش حقیده بویروق بېریلگن.
بیراق اوشبو شهرچهلرنینگ ملکدارلری طالبلر قرارلریگه ناراضیلیک بیلدیریب، طالبلر محکمهلری اولرنینگ حجت و دلیللرینی تۉلیق همده خالصانه کۉریب چیقمهگنینی، قرار چیقریشده عدالت و بېطرفلیککه رعایه قیلینمهگنینی تأکیدلهماقده.
