غزنی ولایتیده اوروشدن قالگن پارتلاوچی راکت اۉقینینگ پارتلشی عاقبتیده اوچ باله هلاک بۉلدی، ینه اوچ کیشی تن جراحتی آلدی. بالهلر تاپیب آلگن راکت اۉقی بیلن اۉینهیاتگن پیتده پارتلش صادر بۉلگن.
محلي منبعلر نینگ معلوم قیلیشیچه، حادثه تیناوون (شنبه،۱۷ اسد) غزنی شهری یقینیدهگی نۉعی منطقهسیده یوز بېرگن.
منبع معلوماتیگه کۉره، بالهلر بۉش یېر میدانیدن راکت اۉقی نی تاپیب آلیب، او بیلن اۉینهیاتگن وقتیده پارتلش صادر بۉلگن.
هلاک بۉلگن بالهلردن ایکّی نفری اکه-اوکه بۉلیب، اولر نینگ یاشی ۱۵-۱۰ آرهسیده بۉلگن.
جراحتلنگنلر طبیات مؤسسهسیگه یېتکزیلگن.
افغانستانده اۉنلب ییللر دوام اېتگن اوروشلر عاقبتیده مملکت نینگ کتّه حدودلری ماینلر و اوروشدن قالگن پارتلاوچی مادّهلر بیلن افلاسلنگن.
بیرلشگن ملتلر تشکیلاتی معلوماتلریگه کۉره، افغانستانده۳.۳میلیون کیشی ماینلر و پارتلهمهگن اۉق-داریلر بیلن افلاسلنگن حدودلردن بیر کیلومتر مصافهده یشهیدی.
شونینگدېک، بیرلشگن ملتلر تشکیلاتی حساباتی بۉییچه، ۲۰۲۵-ییل نینگ اۉزیده اوروشدن قالگن ماینلر و پارتلاوچی مادّهلر سبب۴۷۱نفر تینچ اهالی هلاک بۉلگن یاکه جراحتلنگن. اولر نینگ۶۷ فایزینی بالهلر، اکثریتینی اېسه اۉغیل بالهلر تشکیل اېتگن.
