طالبلر مطبوعات سۉزلاوچیسی اۉرینباسری حمدالله فطرتنینگ معلوم قیلیشیچه، تاپی لایحهسی گازینی خرید قیلیش بۉییچه «افغان گاز» دولت شرکتی همده «تورکمن گاز» شرکتی اۉرتهسیده هرات ولایتینینگ تورغوندی منطقهسیده شرطنامه امضالندی.
اونینگ ایتیشیچه، کېلیشوونی امضالش مراسمیده طالبان باش وزیری نینگ اقتصادي مسألهلر بۉییچه اۉرینباسری عبدالغنی برادر همده تورکمنستان ملي رهبری قربانقلی بردیمحمدوف اشتراک اېتگن.
مذکور شرطنامه گه کۉره، گاز نرخی، افغانستاننینگ گازگه بۉلگن احتیاجی و اونی تقسیملش ترتیبی بېلگیلب آلینهدی.
تاپی- تورکمنستان گازینی افغانستان آرقهلی پاکستان و هندستانگه یېتکزیب بېریشگه مۉلجللنگن گاز قوووری لایحهسیدیر.
لایحه ایلک بار ۲۰۱۵-ییل نینگ دسامبر آییده تورکمنستان حدودیده، ۲۰۱۸-ییل نینگ فبروری آییده اېسه افغانستان نینگ هرات ولایتیده افغانستان، هندستان و تورکمنستان رهبرلری اشتراکیده رسماً آچیلگن اېدی.
طالبلر حاکمیتگه قَیتگنیدن سۉنگ لایحه تۉختهب قالگن، بیراق اوشبو گروه اونی بیر ییل اوّل ینه قَیته ایشگه توشیرگن.
تاپی گاز قوووری نینگ دیامېتری 56 دیویم بۉلیب، او تورکمنستاندهگی گالکینیش گاز کانیدن باشلنهدی و افغانستان، پاکستان همده هندستان آرقهلی اۉتهدی. قووور نینگ عمومي اوزونلیگی بیر مینگ۸۱۴ کیلومترنی تشکیل اېتهدی.
قووور افغانستان نینگ هرات، نیمراز و قندهار ولایتلریدن اۉتیب، پاکستان نینگ کویته و مولتان شهرلری آرقهلی هندستان نینگ پنجاب ایالتیدهگی فضیلکا حدودیگچه یېتیب باریشی رېجهلشتیریلگن. اونینگ ییللیک گاز اوزهتیش قوّتی 33 میلیارد متر مکعب نی تشکیل اېتهدی.
