»میدل ایست آی» وب سایتی نینگ خبر بېریشیچه، خلق ارا جنایت محکمه طالبلر رهبری و عالي محکمه رئیسیگه نسبتاً آچیق اعلان قیلینگن حبسگه آلیش اۉردریدن تشقری، اوشبو گروه نینگ ینه ایکّی نفر عملداریگه نسبتاً هم مخفي طرزده حبسگه آلیش اۉردری چیقرگن.
نشر سهشنبه کونی (۲۰ اسد) مخفي حجتلر و خبردار منبعلرگه تهیهنیب یازیشیچه، مذکور اۉردرلر خلقارا جنایت محکمهسی نینگ اوچ نفر قاضیسی دن عبارت هیئتی تامانیدن چیقریلگن.
«میدل ایست آی» معلوماتیگه کۉره، طالبلر رهبری و عالي محکمه رئیسیگه نسبتاً حبسگه آلیش اۉردری چیقریلگنیدن بیر نېچه آی اۉتگچ، عینِ محکمه هیئتی گروه نینگ ینه ایکّی عملداریگه نسبتاً هم حبسگه آلیش اۉردری بېرگن. بیراق محکمه جریانی نینگ مخفيلیگینی سقلش مقصدیده اولر نینگ شخصی آشکار قیلینمهگن.
نشر نینگ یازیشیچه، او خلقارا جنایت محکمهسی نینگ مخفي حجتلریگه اېگه بۉلگن. اوشبو حجتلر طالبان عملدارلریگه نسبتاً مخفي حبسگه آلیش اۉردرلری ینگی دلیللر همده ینگی دعواگر جبرلنووچیلر نینگ کۉرسهتمهلریگه اساسلنگن حالده چیقریلگنینی کۉرسهتهدی.
اېسلهتیب اۉتمیز، خلق ارا جنایت محکمهسی ۲۰۲۵-ییلده اوشبو محکمه نینگ سابق باش دادستانی کریم خان تقدیم اېتگن سۉراو و دلیللر اساسیده طالبلر رهبری هبتالله آخوندزاده همده طالبان عالي محکمهسی رئیسی عبدالحکیم حقّانيگه نسبتاً حبسگه آلیش اۉردری چیقرگن اېدی.
مذکور اۉردر ۲۰۲۴-ییلده آلتی دولت (شیلی، کاستاریکا، اسپانیا، فرانسه، لوکزامبورگ و مکزیک) طالبانگه قرشی خلقارا جنایت محکمه گه شکایت کیریتگنیدن سۉنگ چیقریلگن.
