منبعلر غزنیده طالبان نینگ «امیرلیک» یېرلرینی انیقلش کمیسیونی بو ولایتده شهرک نو آباد شهرچهسی اهالیسیگه اویلرینی ترک اېتیش اوچون بیر هفته مهلت بېرگنینی، عکس حالده اولر مجبورن چیقریب یوباریلیشینی اَیتماقده.
بیرنینگ منبع «اطلاعات روز» گزیتهسیگه یوبارگن پیامیده ایتیشیچه، طالبلرنینگ اوشبو کمیسیونی یکشنبه کونی شهرک نو آباد شهرچهسی نینگ بیر قطار گذری وکیللری و اهالی وکیللرینی اۉز ادارهسیگه چقیریب، اولردن اویلر و دوکانلرنی اختیاري روشده بۉشهتیشنی سۉرهگن. عکس حالده، «بیز بونی کوچ بیلن قیلهمیز»، دېب تهدید قیلگن.
شهرک نو آباد شهرچهسی اهالیسی طالبلرنینگ بو قرارینی غرضلی دېب حسابلهماقده و هېچ قندهی حالتده اویلرینی ترک اېتیشگه راضی اېمسلیکلرینی اَیتماقده.
شونگه قرهمهی، شهرچه اهالیسیدن بیری حاضرگچه اولر نینگ آوازی اېشیتیلمهگنینی اَیتماقده.
اونینگ سۉزلریگه کۉره، بیر نېچه نفر وکیل طالبلرنینگ کابلدهگی مخصوص محکمهسیگه بارگن، محکمه اعضالری اېسه اولرگه بو مسألهده گروه نینگ عدلیه وزیری راضیلیگینی آلیشلری کېرهکلیگینی ایتگن.
اونینگ ایتیشیچه، شهرک نو آباد اهالیسی نینگ بیر قِسمی اۉز مراجعتلرینی طالبلر رهبریگه یېتکزیش اوچون اوشبو گروه نینگ قندهاردهگی ولایت حاکمی آرقهلی خبر بېریش مقصدیده قندهارگه بارگن.
منبع نینگ ایتیشیچه، طالبلر رهبریگه یوباریلگن مراجعت نینگ نتیجهسی حاضرچه نامعلوم. باشقه بیر منبعگه کۉره، قندهارگه بارگن هیئت غزنیگه قیتماقده. اوشبو هیئت قندهاردهگی طالبان حاکمی بیلن اوچرهشگن.
شونگه قرهمهی، منبع خلق نینگ آوازی اېشیتیلمهیاتگنینی قۉشیمچه قیلگن.
طالبلر غزنیدهگی هزارهلر یشهیدیگن شهرک نو آباد شهرچهسی نینگ یېرلرینی «امیرلیک» یېری دېب اعلان قیلگن.
«اطلاعات روز» گزیتهسی نینگ سوریشتیروویگه کۉره، اوشبو شهرچه 32 ییل اوّل برپا اېتیلگن و حاضرده اونده قریب 18 مینگ عایله استقامت قیلهدی.
شهرک نو آباد اهالیسی اوشبو شهرچهدهگی یېرلرنی ساتیب آلگنلری و کېینچهلیک اولرگه اویلر قورگنلرینی اَیتماقده. بیراق طالبان اولر نینگ بو یېرلرگه اېگهلیک قیلیش حقوقینی تن آلمهگن و شهرچهنی بۉشهتیش حقیده بویروق بېرگن.
«اطلاعات روز» سوریشتیرووی نتیجهلریگه کۉره، محلي اهالی نینگ حجتلری و دلیللری یېترلی درجهده تېکشیریلمهگن.
طالبلر اۉتگن ییلی هم شهرک نو آباد شهرچهسی اهالیسیگه بحثلی یېرلرنی اوشبو گروه نینگ عدلیه وزیری عبدالحکیم شرعيگه تاپشیریشنی ایتگن اېدی.
اۉتگن ییلی محلي منبعلر قاضی نینگ حکمنی اهالیگه اعلان قیلگنیدن سۉنگ: «هېچ کیم سیزلرنی کۉچیرمهیدی، اما ملکینگیز قانوني مقامگه اېگه بۉلیشیگه حرکت قیلینگ»، دېگنینی ایتگن اېدی. منبعلرگه کۉره، طالبان قاضیسی نینگ بو گپلریدن کېین اولر آلدیده ایکّی یۉل قالگن: یا اویلرینی طالباندن اجارهگه آلیشلری، یاکه اولرنی طالباندن ساتیب آلیشلری کېرهک اېدی.
بیراق طالبلرنینگ یېرلرنی اېگهللب آلیش نینگ آلدینی آلیش و اېگهللب آلینگن یېرلرنی قَیتریش تۉغریسیدهگی قانونیده شوندهی دېییلگن: «اگر دولت تامانیدن اېگهللب آلینگن یېرلرده شهرچه قوریلگن بۉلسه و یېر تورر جای یاکه یریم تورر جای شهرچهسی رېجهسیده بۉلیب، دولت لایحهسی آستیده بۉلمهسه، یېر نینگ عملدهگی کوندهلیک نرخی اېگهللب آلووچیدن یاکه شرعي بۉلمهگن طرزده تصرف قیلووچیدن اوندیریلهدی.»
