انسان حقوقلری کوزهتووی تشکیلاتینینگ ایتیشیچه، نادولت «عیاللر و بالهلر حقوقلرینی تدقیق قیلیش جمغرمهسی» نینگ آلتی خادیمی بیر آیدن بویان طالبلر تامانیدن مجبورن غایب قیلینگن.
اوشبو تشکیلات بوگون (پنجشنبه،۲۲ اسد) بیاناتیده ایتیشیچه، طالبان ۱۸-جولای کونی کابلده حبسگه آلینگن آلتی خادم نینگ قهیېرده سقلنهیاتگنی حقیده حاضرگچه هېچ قندهی معلومات بېرمهگن.
انسان حقوقلری کوزهتووی طالبلر رسميلری اوشبو شخصلرنینگ عایله اعضالری و وکیل مدافعلریگه اولر بیلن اوچرهشیشگه رخصت بېریشی، اگر اولرگه قرشی هېچ قندهی عیبلاو ایلگری سوریلمهگن بۉلسه، درحال آزاد قیلیشی کېرهکلیگینی بیلدیرگن.
«عیاللر و بالهلر حقوقلرینی تدقیق قیلیش جمغرمهسی» حمایه دستورلرینی عملگه آشیرهدی همده عیاللر و بالهلر حقوقلری بۉییچه تدقیقات و ترغیبات ایشلری آلیب بارهدی.
انسان حقوقلری کوزهتووینینگ عیاللر حقوقلری بۉلیمی مدیری ماکارنا سائسنینگ ایتیشیچه: «طالبلر عیاللر و قیزلرگه یاردم بېریشگه قرهتیلگن هر قندهی حرکتنی اۉزیگه تهدید دېب بیلهیاتگنگه اۉخشهیدی. اولر اوشبو آلتی خادم نینگ قهیېرده سقلنهیاتگنی حقیده درحال معلومات بېریشی و اگر اولر ناقانوني روشده حبسگه آلینگن بۉلسه، آزاد قیلیشی کېرهک.»
انسان حقوقلری کوزهتوویگه کۉره، ۲۱جون کونی طالبلر کوچلری کابلدهگی «عیاللر و بالهلر حقوقلرینی تدقیق قیلیش جمغرمهسی» ادارهسیگه باستیریب کیریب، خادملرنینگ لپ تاپلری و تیلفونلرینی مصادره قیلگن.
انسان حقوقلری کوزهتوویگه معلومات بېرگن منبع نینگ ایتیشیچه، طالبان کوچلری ادارهنی تینتوو قیلگن، اونی مُهرلب قۉیگن و کېینگی هفتهلرده خادملرنی اوشبو تشکیلات نینگ فعالیتی حقیده سۉراق قیلگن.
۱۸جولای کونی طالبلر رسميلری جمغرمهنینگ آلتی نفر اېرکک خادیمیگه مصادره قیلینگن جهازلرنی آلیب کېتیش اوچون تشکیلات اداره سیگه قَیتیشنی بویورگن. بیراق اولرنینگ برچهسی حبسگه آلینگن.
اولرنینگ عایله اعضالرینینگ ایتیشیچه، طالبلر رسميلری حاضرگچه اولر نینگ قهیېرده سقلنهیاتگنی، احوالی یاکه احتمالي عیبلاولری حقیده هېچ قندهی معلومات بېرمهگن.
جمغرمه نینگ سابق مدیری، حاضر کناداده همکار تشکیلاتنی باشقرهیاتگن زرقا یفتلی: «اولرنینگ عایلهلری دایمي قۉرقوو و ناانیقلیک ایچیده یشهماقده»، دېگن.
طالبلر ۲۰۲۱-ییل اگوستیده حاکمیتگه قَیتگنیدن بېری عیاللر و قیزلر حقوقلرینی تاباره کۉپراق چېکلب کېلماقده. حاضرده افغانستان عیاللری و قیزلری تعلیم آلیش، ایشلش و اېرکین حرکتلنیش حقوقیدن محروم اېتیلگن.
اوشبو گروه سۉنگگی بېش ییل دوامیده اۉز چېکلاولریگه قرشی چیققن تنقیدچیلرنی، جملهدن، عیاللرنی حبسگه آلیب، قماققه تشلب کېلگن.
انسان حقوقلری کوزهتووی نینگ معلوم قیلیشیچه، اوشبو شخصلرنینگ کۉپچیلیگی اۉزباشیمچهلیک بیلن حبسگه آلینگن و قماققه تشلنگن، هفتهلب مجبورن غایب قیلینگن، آغیر شرایطلرده سقلنگن و قییناققه سالینگن.
شو بیلن بیرگه، انسان حقوقلری کوزهتووی حکومتلر طالباننی عیاللرگه نسبتاً کوچهییب بارهیاتگن حرکتلرنی تۉختهتیش همده انسان حقوقلری حمایهچیلرینی حبسگه آلیش و مجبورن غایب قیلیش حالتلریگه برهم بېریش اوچون باسیم آستیده اوشلب توریشی کېرهکلیگینی ایتگن.
تشکیلات نینگ تأکیدلشیچه، حکومتلرنینگ افغانستاندهگی انسان حقوقلری بحرانیگه مناسبتی یېترلی اېمس.
ماکارنا سائس نینگ ایتیشیچه: «حکومتلر طالبلرنی عیاللرگه نسبتاً کوچهییب بارهیاتگن حرکتلرگه شونینگدېک، انسان حقوقلری حمایهچیلری نینگ حبسگه آلینیشی و مجبورن غایب قیلینیشی اوچون باسیم آستیده اوشلب توریشی کېرهک. بیراق بو نینگ اۉرنیگه اَیریم حکومتلر دېپورتتسيهلرنی کۉپهیتیریش مقصدیده طالبل بیلن همکارلیک قیلماقده. بو دېپورتلر افغانستانگه قَیتریلهیاتگن شخصلرنی خوف آستیده قالدیرماقده.»
