انسان پرورلیک یاردم نینگ افغانستانگه قیسقریشی بیلن بیر وقتده، «بالهلر قوتقرو» تشکیلاتی مملکتده اۉتکیر تۉییب طعاملنمسلیکدن اذیت چېکهیاتگن بالهلر سانی آرتیب بارهیاتگنینی معلوم قیلدی.
اوشبو تشکیلات بوگون (پنجشنبه، ۲۲-اسد) اعلان قیلگن گزارشیده حاضرده بېش یاشگچه بۉلگن هر۱۰ بالهدن بیری اۉتکیر تۉییب طعاملنمسلیک عاقبتیدهگی آغیر آزغینلیکدن اذیت چېکهیاتگنینی بیلدیردی.
بیرلشگن ملتلر تشکیلاتی معلوماتلریگه کۉره، ۲۰۲۶-ییل نینگ ایکّینچی چارهگیده بالهلر آرهسیدهگی آغیر آزغینلیک یاکه اۉتکیر تۉییب طعاملنمسلیک درجهسی اۉتگن ییل نینگ شو دوریگه نسبتاً افغانستان ولایتلرینینگ اوچدن ایکّی قِسمیده یامانلشگن.
«بالهلر قوتقرو» تشکیلاتینینگ قۉشیمچه قیلیشیچه، سۉنگگی تۉرت ییل ایچیده بېش یاشگچه بۉلگن بالهلر آرهسیده اۉتکیر تۉییب طعاملنمسلیک درجهسی۱۴ فایزگه آشگن و جاري ییلده۳.۷میلیون بالهگه تأثیر کۉرسهتگن.
بالهلر آرهسیده تۉییب طعاملنمسلیک حالتلرینینگ کېنگهییشی افغانستانگه انسان پرورلیک یاردم قیسقرهیاتگن بیر پیتگه تۉغری کېلماقده.
«بالهلر قوتقرو» تشکیلاتی معلوماتلریگه کۉره، تۉرت ییل دوامیده افغانستانگه کۉرسهتیلهیاتگن انسان پرورلیک یاردم قریب۷۰ فایزگه کمهییب، ۲۰۲۲-ییلدهگی۳.۲۷میلیارد دالردن ۲۰۲۵-ییلده۱ میلیارد دالرگچه توشگن.
۲۰۲۶-ییل نینگ یرمیدن کۉپی اۉتگن بۉلسه-ده، افغانستاندهگی بحراننی برطرف اېتیش اوچون ضرور بۉلگن مبلغ نینگ اتیگی۴۳۸ میلیون دالری تأمینلنگن. بو اېسه۷۴ فایزلیک مالیوي یېتیشماوچیلیکنی انگلهتهدی.
«بالهلر قوتقرو» تشکیلاتی نینگ قۉشیمچه قیلیشیچه، مبلغ یېتیشمسلیگی سببلی قریب۶۰۰ ته طبیات مرکزی یاپیلگن یاکه فعالیتی تۉختهتیلگن. بو حالت قریب۴ میلیون کیشیگه، اولر نینگ دېیرلی یرمی بالهلرگه تأثیر کۉرستگن.
تشکیلات نینگ بیلدیریشیچه، یاردم قیسقرگنیدن سۉنگ قیسقه مدتلی مبلغلردن فایدهلنیب،۱۴ ته طبیات مرکزینی فعالیتینی دوام اېتتیریشگه و مملکت نینگ اېنگ چېکّه حدودلری نینگ اَیریملریده اساسي طبي خدمتلرنی کۉرسهتیشگه موفق بۉلگن. بیراق حاضر بو کلینیکلر و باشقه مرکزلرنینگ کېلهجگی خوف آستیده.
«بالهلر قوتقرو» تشکیلاتی نینگ قۉشیمچه قیلیشیچه، ۲۰۲۵ییل باشیدن بېری یاردم نینگ قیسقریشی آرتیدن طبیات مرکزلری و کۉچمه طبي گروهلر نینگ یاپیلیشی یاکه فعالیتی نینگ قیسقریشی سببلی قریب۷۰۰ مینگ کیشی، جملهدن، بېش یاشگچه بۉلگن۱۴۰ مینگ باله اساسي طبي خدمتلردن فایدهلنیش امکانیتیدن محروم بۉلگن.
«بالهلر قوتقروو» تشکیلاتی نینگ افغانستاندهگی مدیری اشیش دامل شوندهی دېگن: «دنیا یوز اۉگیریب کېته آلمهیدی. آغیر آچلیک، قَیتیب کېلهیاتگنلر سانی نینگ حیرتلنرلی درجهده کۉپلیگی و طبيعي آفتلر، سۉنگگی ماجرالر همده تۉرت ییللیک قورغاقچیلیک عاقبتیده یوزهگه کېلگن کېنگ کۉلملی ایچکی کۉچیشلر چېکلنگن انسان پرورلیک منبعلرنی قولهش یاقهسیگچه باسیم آستیده قالدیرماقده.»
«بالهلر قوتقرو» تشکیلاتی نینگ قۉشیمچه قیلیشیچه، خلقارا همجعیت حاضر تنلاو آلدیده توریبدی: عایلهلر بوتونلهی بحرانگه یوز توتگنیدن کېینگینه جواب بېریشده دوام اېتهدیمی یاکه بالهلر نینگ حیاتی، حقوقلری و کېلهجگینی حمایه قیلیش اوچون یېترلیچه اېرته چارهلر کۉرهدیمی؟
