منبعلرنینگ ایتیشیچه، بدخشانده سۉنگی تۉقنهشوولرده اۉلگن طالبلرنینگ ۱۳کیشی جنگچیسی جسدی قندهاردهگی ۲۰۵-قول اردوگه آلیب کېلینگن.
منبعلرگه کۉره، هلاک بۉلگن جنگچیلرنینگ آلتی نفری هلمند، تۉرت نفری ارزگان و ینه اوچ نفری غزنی ولایتیدن بۉلگن.
منبعلر اوشبو جسدلر جمعه کونی،۲۳اسد کونی قندهارگه آلیب کېلینگنی و کېینچهلیک اۉز ولایتلریگه یوباریلیشی رېجهلشتیریلگنینی اَیتماقده.
منبعلرنینگ قۉشیمچه قیلیشیچه، هلاک بۉلگنلر طالبلر مدافعه وزیرلیگی نینگ مخصوص کوچلری ترکیبیده بۉلگن و بدخشانده سۉنگی بیر نېچه کون دوامیده یوز بېرگن تۉقنهشوولرده اۉلدیریلگن.
منبعلرگه کۉره، بو شخصلرنینگ عایلهلریگه یقینلری نینگ هلاک بۉلگنی حقیدهگی معلوماتلرنی هېچ کیم بیلن بۉلیشمسلیک ایتیلگن. منبعلر طالبلر جنگچیلرنینگ عایلهلریگه اولر نینگ ترافیک حادثهسیده هلاک بۉلگنینی بیلدیرگنینی اَیتماقده.
طالبلر بدخشانده اۉزینینگ ناراضی قوماندانی جمعهخان فاتح طرفدارلری بیلن تۉقنهشگن.
تۉقنهشوولر سهشنبه کونیدن بدخشاننینگ نسی تومنیده باشلنگن.
طالبلر اوشبو تۉقنهشوولرنی تصدیقلهگن، بیراق اولر حقیده باتفصیل معلومات بېرمهگن.
جمعهخان فاتح تۉقنهشوولر حقیده گپیرر اېکن، طالبان رژیمی بیلن معماسی یۉقلیگینی، بلکه طالبلرنینگ اَیریم بۉلینمهلری بیلن معماسی بارلیگینی ایتگن. او طالبان بۉلینمهلرینی تینچ اهالینی اۉلدیریشده عیبلهگن.
