بیرلشگن ملتلر تشکیلاتی نینگ افغانستان بۉییچه مخصوص انسان حقوقلری گزارشگری ریچارد بنت، طالبان حکومتینی نارمللشتیریشدن آگاهلنتیریب، بو گروه بیلن مناسبتلرنی نارمللشتیریش قتغانلرگه قانونيلیک بېریشینی ایتدی.
بنت بوگون (شنبه،۲۴ اسد) بیرلشگن ملتلر تشکیلاتینینگ کارشناسلرینینگ بیاناتینی اعلان قیلیب، شوندهی دېدی: «بیر ییل اوّل بیز طالبلر حکومتینی نارمللشتیریشدن آگاهلنتیرگن اېدیک. بوگون بو آگاهلنتیریشنی ینهده قطعي تکرارلهیمیز، چونکه نارمللشتیریشگه بۉلگن اینتیلیش کوچهیماقده، بیراق اونی آقلش اوچون ضرور بۉلگن سببلر اۉزگرگنی یۉق».
او اۉز اهالیسی نینگ یرمیدن کۉپراغینی منتظم روشده تعقیب و قتغان قیلهیاتگن حکومت بیلن مناسبتلرنی نارمللشتیریش اۉزگریشلرگه یاردم بېرمسلیگینی، عکسینچه، قتغانلرگه قانونيلیک بېریشینی تأکیدلهدی.
بیرلشگن ملتلر تشکیلاتینینگ انسان حقوقلری بۉییچه کارشناسلری انسان حقوقلری ساحهسیده سېزیلرلی یوتوقلرگه اېریشیلمهگونچه، طالبلر بیلن مناسبتلرنی نارمهللشتیریشگه قرهتیلگن هېچ قندهی قدم تشلنمسلیگی کېرهکلیگینی تأکیدلهدیلر.
اولر اۉتگن هفته اعلان قیلینگن قۉشمه بیاناتده: «طالبلرنینگ عملدهگی حاکمیت وکیللری بیلن مناسبتلرنی نارمللشتیریشگه قرهتیلگن هېچ قندهی قدم، جملهدن، دیپلوماتلرینی قبول قیلیش یاکه اولر بیلن پایتختلرده اوچرهشوولر اۉتکزیش عملگه آشیریلمسلیگی کېرهک.
بو نینگ اوچون انسان حقوقلری، اینیقسه، عیاللر و قیزلر حقوقلری ساحهسیده انیق و اۉلچب بۉلهدیگن یوتوقلرگه اېریشیلیشی لازم»، دېگن.
بیرلشگن ملتلر تشکیلاتی متخصصلری اوشبو شرط بیرلشگن ملتلر تشکیلاتی کۉمهگیده تشکیل اېتیلهدیگن ملاقات و اوچرهشوولرگه نسبتاً هم قۉللنیلیشی کېرهکلیگینی ایتدیلر. شونینگدېک، اولر افغانستان نینگ کېلهجگیگه عاید هېچ قندهی جریان افغان عیاللری نینگ تۉلیق و مضمونلی اشتراکیسیز عملگه آشیریلمسلیگی کېرهکلیگینی تأکیدلهدیلر.
بیرلشگن ملتلر تشکیلاتی متخصصلری عیاللر و قیزلرنی جنسی اساسیده اساسي حقوقلردن قصداً و تیزیملی روشده محروم قیلیش انسانیتگه قرشی جنایت – جندر اساسیدهگی تعقیب و تعقیب آستیگه آلیش جنایتی نینگ بیر کۉرینیشی اېکنینی ینه بیر بار تأکیدلهدیلر.
اولرنینگ ایتیشیچه، بو قتغان جندرگه اساسلنگن نهادیلشتیریلگن، ظلم و حکمرانلیک تیزیمی نینگ بیر قِسمی بۉلگنی سببلی، اونی «جنسی آپارتاید» دېب هم تعریفلش ممکن.
بیرلشگن ملتلر تشکیلاتی کارشناسلری دولتلرنی «جنسی آپارتاید»نی انسانیتگه قرشی مستقل جنایت صفتیده خلقارا حقوقده بېلگیلشنی فعال قۉللب-قوّتلشگه چقیردیلر.
