»افغانستان پولیوسیز» صحیفهسی افغانستانده پولیو، یعنی بالهلر فلجیگه قرشی اېملش کمپاینی بېش ولایتده باشلنگنینی معلوم قیلدی.
اوشبو کمپنی بوگون، دوشنبه کونی (۲۶ اسد)، ننگرهار نینگ برچه۲۲اولسواللیگیده، کنر ولایتی نینگ۷ اولسواللیگیده، کابل نینگ۶ اولسواللیگیده، هرات نینگ۲ اولسواللیگیده و فراه نینگ ۲ اولسواللیگیده باشلندی.
«افغانستان پولیوسیز» صحیفهسی ایکس اجتماعي ترماغیده یازیشیچه، کمپایندن مقصد یقینده انیقلنگن پولیو حالتلریگه تېزکار جواب بېریش و ویروس نینگ ینه-ده ترقهلیشی نینگ آلدینی آلیش دیر.
جهان ساغلیقنی سقلش تشکیلاتی ایکّی هفته آلدین جاري ییلده افغانستانده پولیونینگ۱۵ ته ایجابي حالتی قید اېتیلگنینی معلوم قیلگن اېدی.
یقینده ارزگان ولایتیده ایکّی یاشلی قیزنینگ پولیو عاقبتیده فلج بۉلگنی تصدیقلندی.
جهان ساغلیقنی سقلش تشکیلاتی معلوماتلریگه کۉره، افغانستان حاضرده دنیاده پولیو بیلن کسللنیش حالتلری اېنگ کۉپ قید اېتیلهیاتگن مملکت حسابلنهدی.
حاضرده افغانستان و پاکستان پولیو حلی هم بوتونلهی یۉق قیلینمهگن دنیادهگی یگانه دولتلردیر.
دنیا ساغلیقنی سقلش تشکیلاتی معلوماتلریگه کۉره، ۲۰۲۶ییل باشیدن بویان پاکستانده پولیو نینگ۳ ته انساندهگی حالتی و اطراف-محیطدن آلینگن۱۰۸ ته ایجابي نمونه انیقلنگن.
اۉتگن ییلی افغانستانده پولیونینگ۲۱ ته انساندهگی حالتی و اطراف-محیطدن آلینگن۹۴ ته ایجابي نمونهسی قید اېتیلگن.
