طالبلر عدلیه وزیرلیگی «باسیب آلینگن یېرلر بیلن باغلیق ایشلرنی کۉریب چیقووچی مخصوص محکمه» بلخ ولایتی مرکزی مزار شریف شهریدهگی «مایار مینه» شهرچهسی نینگ قریب۳۰۰ جېریب یېرینی «امیرلیک ملکی» دېب بېلگیلهگنینی معلوم قیلدی.
وزیرلیک بوگون (سهشنبه،۲۷ اسد) بیاناتیده اوشبو یېرلر مزار شریف شهری نینگ ۹-ناحیهسیگه قرهشلی قلعهیې حجری منطقهسیده جایلشگنینی ایتدی.
طالبلر عدلیه وزیری عبدالحکیم شرعی باشچیلیگیده فعالیت یوریتووچی «یېرلرنی باسیب آلیش نینگ آلدینی آلیش و باسیب آلینگن یېرلرنی قَیتریش کمیسیونی» مذکور ایشنی کۉریب چیقیب، شمالي زون باسیب آلینگن یېرلر بیلن باغلیق ایشلرنی کۉریب چیقووچی مخصوص محکمهگه تاپشیرگن.
طالبلر عدلیه وزیرلیگی نینگ معلوم قیلیشیچه، مخصوص محکمه یېر اېگهلری و کمیسیون تقدیم اېتگن حجتلرنی اۉرگنیب، کۉچمس ملک ادارهلریدن معلوماتلر آلگن همده تېگیشلی دولت ادارهلریدن اخبارات تۉپلهگن. شوندن سۉنگ محکمه اوشبو شهرچهدهگی جمعی ۳۰۰ جېریب یېرنینگ برچهسی «امیرلیک ملکی» اېکنیگه قرار قیلگن.
مخصوص محکمه مذکور یېرلرنی اېگهللب تورگن شخصلردن طالبانگه قَیتریش حقیده هم حکم چیقرگن.
طالبلر سۉنگگی ییللرده قیشلاقلرده میلیونلب جېریب و کابل، غزنی، بلخ، هرات همده ننگرهار شهرلریده مینگلب جېریب یېرنی «امیرلیک ملکی» دېب اعلان قیلگن.
طالبلرنینگ تأکیدلشیچه، بو شهرچهلردهگی یېرلر خصوصي بۉلمهگن و دولتدن ساتیب آلینمهگن. بیراق یېر و اویلر نینگ حاضرگی اېگهلری همده تصرفچیلری بوندهی قرارلر اېتنیک و سیاسي سببلرگه اېگه اېکنینی اَیتماقده. اولر نینگ تأکیدلشیچه، طالبلر آدملر خصوصي ملکدارلردن ساتیب آلگن و دولت محکمهلری تامانیدن تصدیقلنگن خصوصي یېرلرنی «امیرلیک ملکی» دېب اعلان قیلیب، اولرنی قَیتریش حقیده حکم چیقرماقده.
جملهدن، سۉنگگی هفتهلرده طالبان هزارهلر استقامت قیلهدیگن ایکّی شهرچه کابلدهگی «اميد سبز» و غزنیدهگی «نوآباد» شهرچهلرینی بۉشهتیش حقیده هم بویروق بېرگن.
