انسان حقوقلری بۉییچه تېکشیرووچی فرشته عباسی، اروپا نینگ طالبلر بیلن مناسبتلرینی تنقید قیلیب، بیر تاماندن طالبلرنینگ سوءاستعماللرینی قارهلب، ایکّینچی تاماندن اېسه مهاجرلرنی بو گروه نظارتیدهگی حدودگه دېپورت قیلیش «ایکّی یوزلمهچیلیک نینگ اېنگ یوقاری چۉقّیسی» اېکنینی ایتدی.
خانم عباسی بو فکرلرینی «هیلل» نشریده چاپ اېتیلگن مقالهسیده بیلدیرگن و هېچ کیم طالبلر حکمرانلیگی آستیدهگی حدودگه دېپورت قیلینمسلیگی کېرهکلیگینی تأکیدلهگن.
فرشته عباسی ایکسدهگی پُستیده اروپا اتفاقی بیرشگن ملتلر تشکیلاتی انسان حقوقلری کېنگشی رهبرلیگیده افغانستانده طالبلرنینگ جدّي سوءاستعماللری بیلن باغلیق دلیللرنی تۉپلش و سقلش اوچون تېرگاو میکانیزمینی تشکیل قیلگنینی یازگن.
اوشبو میکانیزمنی آلقیشلهگن عباسی آلمان، هالند، آسترلیا و کانادا طالباننی «عیاللرگه نسبتاً کمسیتیش نینگ برچه شکللریگه برهم بېریش تۉغریسیدهگی کانوانسیون»نی بوزگنلیکلری اوچون جوابگرلیککه تارتیش تشبثینی ایلگری سورهیاتگنینی ایتگن.
انسان حقوقلری بۉییچه تدقیقاتچیسی اروپا دولتلری و امریکا نینگ مهاجرلرنی افغانستانگه دېپورت قیلیش اوچون طالبلر بیلن همکارلیک قیلیشگه قرهتیلگن سعی-حرکتلریگه هم تۉختهلگن.
عباسی اروپا کمیسیونی 22-جون کونی بروکسلده طالبان هیئتینی قبول قیلگنی و آلمان ایکّی طالب دیپلوماتینی قبول قیلگنینی تأکیدلب، بویوک بریتانیا هم شونگه اۉخشش سیاستنی کۉزلهیاتگنینی ایتگن.
اونینگ قۉشیمچه قیلیشیچه، امریکا قطردهگی لاگېرده قالیب کېتگن قریب بیر مینگ 100 نفر افغان باشپناه ایزلاوچیگه افغانستانگه قَیتیش یاکه نامعلوم باشقه جایگه کۉچیریلیشی ممکنلیگی حقیده باسیم اۉتکزماقده.
انسان حقوقلری بۉییچه تدقیقاتچیسی: «طالبلرنینگ سوءاستعماللرینی بیر لحظهده قارهلب، کېینگی لحظهده آدملرنی اولرنینگ حکمرانلیگی آستیگه قَیتریشده همکارلیک قیلیش – ایکّی یوزلمهچیلیک نینگ اېنگ یوقاری چۉقّیسیدیر»، دېدی.
او مهاجرت بۉییچه کېلیشوولر طالبلرنینگ دوام اېتهیاتگن سوءاستعماللری اوچون جوابگرلیگیگه بۉلگن باسیمنی کمهیتیریشی حقیده آگاهلنتیردی.
خانم عباسینینگ فکریچه، بوندهی «تخنیکي» همکارلیک هر قندهی «تجاوزکار حکومت»گه خوفلی خبر یوبارهدی: انسان حقوقلری نینگ بوزیلیشی و ظلم نینگ هېچ قندهی درجهسی، حتا جبرلنگنلر حسابیگه هم باشقه دولتلرنینگ سیز بیلن کېلیشوو توزیشیگه تۉسقینلیک قیلمهیدی.
او «هېچ کیم تعقیب، قییناق یاکه باشقه جدّي ضرر خوفیگه دوچ کېلهدیگن جایگه یوباریلمسلیگی کېرهک» دېگن تمایلگه اساسلنیب، هېچ بیر مهاجر طالبان باشقرهیاتگن افغانستانگه یشش اوچون قَیتریلمسلیگی کېرهکلیگینی تأکیدلهدی.
پاکستانگه قاچیب کېتگن و کېینچهلیک افغانستانگه قَیتریلگن سابق خوفسیزلیک خادیمی شوندهی دېگن: «یوزلرینی بېرکیتیشردی و هر کېچه مېنی کلتکلشردی. کېین مېنی تورمهدن آلیب چیقیب، موترگه اۉتقزیشردی و «اۉلیم جاییگه» آلیب کېتهیاتگنلرینی ایتیشردی. ایکّی آی دوامیده هر کېچه اۉلدیریلیشیمنی کوتیب یشهدیم.»
فرشته عباسی بوندهی تقدیر «تخنیکي همکارلیک» اساسیده افغانستانگه دېپورت قیلینهیاتگن هر قندهی مهاجرنینگ باشیگه توشیشی ممکنلیگینی ایتگن.
