بیرلشگن ملتلر تشکیلاتینینگ افغانستانده انسان حقوقلری بۉییچه مخصوص گزارشگلری ریچارت بنت، کابل غربیدهگی مکتبده یوز بېرگن پارتلشنی «هجوم» دېب اتهب، اونی قارهلهدی.
بنت بوگون (سهشنبه،۲۷ اسد) ایکس اجتماعي ترماغیده بیانات نشر قیلیب، اوشبو حادثه یوزهسیدن تۉلیق و مستقل تېرگاو اۉتکزیش همده عیبدارلرنی محکمه قیلیشگه چقیردی.
بیرلشگن ملتلر تشکیلاتی مخصوص گزارشگری شوندهی یازدی: «کېچه دشت برچیدهگی مکتبده کۉپلب بالهلرگه ضرر یېتکزگن وحشیانه هجومنی قارهلهیمن.»
او ینه کابلنینگ هزارهلر استقامت قیلهدیگن منطقهسی نشانگه آلینگنینی تأکیدلب، بونی اَینچلی حالت دېب اتهدی.
بنت «حادثه عیبدارلرینی محکمه قیلیش مقصدیده تۉلیق و مستقل تېرگاو اۉتکزیش ضرور»، دېدی.
تیناوون توشدن کېین کابل شهری نینگ 18-خوفسیزلیک ناحیهسیگه قرهشلی دشت برچی حدودیدهگی مهديه شهرچهسیده جایلشگن «شمع هدایت» خصوصي مکتبیده پارتلش یوز بېرگن. حادثه عاقبتیده اۉنلب اۉقووچیلر جراحتلنگن.
طالبلر پارتلش یوز بېرگنینی تصدیقلهگن، بیراق حادثه نینگ قندهی صادر بۉلگنی حقیده حاضرچه تفصیلات بېرمهگن. معلوماتلرگه کۉره،۱۸ یاشگه تۉلمهگن قریب ۵۰ اۉقووچی یرهلنگن.
منبعلر اۉقووچیلر درسدن چیقریلگن پیتده پارتلاوچی مادّه مکتب حویلیسیگه تشقریدن اولاقتیریلگنینی ایتگن. افغانستان اسلامي خلق بیرلیگی حزبی رهبری محمدمحقق هم خودّی شو معلوماتنی کېلتیریب، «بو فاجعه اوچون مسوولیت طالبان ذمّهسیده»، دېگن.
