خلقارا عفو تشکیلاتی «اطلاعات روز» گزېتهسی ژورنالیستی حمید فرهادي طالبلر قماقخانهسیدن آزاد قیلینگنینی آلقیشلهدی. تشکیلات اونینگ سۉز اېرکینلیگی حقوقیدن تینچ یۉل بیلن فایدهلنگنی اوچون هېچ قچان قملمسلیگی کېرهکلیگینی ایتدی.
تشکیلات فرهادي آزادلیگی اوچون آلیب باریلگن کمپایننی قۉللب-قوّتلهگن برچه انسانلرگه منّتدارلیک بیلدیردی.
ژورنالیست حمید فرهادي طالبان تامانیدن «اطلاعات روز» گزېتهسی بیلن همکارلیک قیلگنی عیبلاوی بیلن قملگن اېدی. او ایکّی ییلدن سۉنگ، اۉتگن هفته آخریده طالبان قماقخانهسیدن آزاد قیلیندی.
فرهادي 2024-ییل 3-سپتمبر کونی کابل شهریده طالبلر ایچکی ایشلر وزیرلیگی کوچلری تامانیدن حبسگه آلینگن اېدی.
او 19-سپتمبر کونی طالبان محکمهسی تامانیدن «طالبلرگه قرشی ترغیبات» آلیب باریش و «اطلاعات روز» گزېتهسی بیلن همکارلیک قیلیش عیبلاولری بیلن ایکّی ییلگه آزادلیکدن محروم اېتیلگن.
افغانستان ژورنالیستلر مرکزینینگ معلوم قیلیشیچه، فرهادي وکیل مدافع یاللش حقوقیدن محروم قیلینگن حالده، مستقل ژورنالیستلیک بیلن شغللنگنی و جمعیتدهگی واقعلیکلرنی یاریتگنی اوچون عدالتسیز محکمه جریانیده قماققه حکم قیلینگن. او ایکّی ییل عمرینی پولچرخي و بگرام قماقخانهلریده اۉتکزگن.
مرکز طالبلردن ژورنالیستلرنینگ حقوقلرینی حرمت قیلیشنی همده قماقده سقلنهیاتگن باشقه ژورنالیستلر و میدیا خادملرینی هم امکان قدَر تېزراق آزاد قیلیشنی سۉرهگن. مرکز معلوماتیگه کۉره، حاضرده کمیده ایکّی نفر مېدیا خادیمی، جملهدن، بیر ژورنالیست و بیر مېدیا رهبری، طالبلر استخباراتی تامانیدن بیر ییلدن کۉپراق وقت آلدین حبسگه آلینگن بۉلسه-ده، هنوز قماقده سقلنماقده.
