افغانستاندهگی اروپا اتفاقی وکالتخانهسی کابل غربیدهگی مکتبده یوز بېرگن پارتلش و اونینگ عاقبتیده اۉنلب اۉقووچیلر جراحتلنگنیدن چوقور خواطر بیلدیردی.
وکالتخانه ایکسدهگی بیاناتیده یرهلنگن اۉقووچیلرنینگ عایلهلریگه همدردلیک بیلدیرگن.
افغانستاندهگی اروپا اتفاقی وکالتخانهسی شوندهی یازدی: «مکتبلر خوفسیز جایلر بۉلیشی کېرهک؛ بالهلر و تعلیم مؤسسهلریگه قصداً هجوم قیلیش مطلقا مامقبول دیر.»
تیناوون (دوشنبه،۲۶ اسد) ساعت تخمیناً ۵:۰۰ ده کابل نینگ ۱۸-خوفسیزلیک ناحیهسیدهگی مهديه شهرچهسیده جایلشگن «شمع هدایت» خصوصي مکتبی حویلیسیده پارتلش یوز بېردی.
بیر منبع «اطلاعات روز» گزیتهسیگه اۉقووچیلر صنفلردن چیققن پیتده قرهمه-قرشی کۉچهدن مکتب حویلیسیگه قۉل نارنجکی اولاقتیریلگنینی ایتگن.
طالبلرنینگ کابلدهگی امنیه قوماندانلیگی سۉزلاوچیسی پارتلش یوز بېرگنینی تصدیقلب، حادثهده بیر قنچه بالهلر جراحتلنگنینی بیلدیرگن.
خالد زدران پارتلش قۉل بۉمبهسینینگ اولاقتیریلیشی عاقبتیده یوز بېرگنینی ایتگن.
کمیده 52 باله یرهلنگنی حقیده خبر بېریلگن. بیراق مکتب مدیری جراحتلنگنلر سانینی 44 نفر دېب بیلدیرگن.
یرهلنگن بالهلر آرهسیده قیزلر هم، اۉغیل بالهلر هم بار.
تأکیدلش جایزکی، کابلنینگ هزارهلر استقامت قیلهدیگن غربي حدودیدهگی مکتبلر و اۉقوو مرکزلری بیر نېچه بار هلاکتلی هجوملرگه اوچرهگن. اوشبو هجوملرنینگ اکثریتی اوچون جوابگرلیکنی «اسلامي دولت» (داعش) اۉز ذمّهسیگه آلگن.
