پنجشیرده محلي منبعلر طالبلر بو ولایتنینگ پریان اولسواللیگیده تۉرت کیشی تینچ اهالینی حبسگه آلگنینی اَیتماقده.
پریان اولسواللیگیدهگی منبعلرنینگ یېتکرمه لرگه معلوم قیلیشیچه، بو شخصلر دوشنبه کونی (۲۶-اسد) «کوجان» قیشلاغیدن حبسگه آلینگن.
منبعلرگه کۉره، حبسگه آلینگنلر دهقانچیلیک بیلن شغللنووچی یاشلر بۉلیب، اولر طالبلرگه قرشی هېچ قندهی گروه یاکه تشکیلات بیلن علاقهگه اېگه اېمس.
خوفسیزلیک سببلی شخصینی آشکار قیلمسلیکنی سۉرهگن منبعلر طالبلر کوچلری بو تۉرت نفر یاشنی حبسگه آلگنیدن سۉنگ پنجشیر ولایتی مرکزیگه آلیب کېتگنینی اَیتماقده. آرهدن ایکّی کېچه-کوندوز اۉتگن بۉلسه-ده، اولر نینگ تقدیری حقیده حاضرچه هېچ قندهی معلومات یۉق.
پنجشیر اهالیسی طالبلر مملکتده حاکمیتنی اېگهلهگنیگه بېش ییل بۉلگنیگه قرهمهی، بو ولایتدهگی وضعیت همان «حربيلشتیریلگن» حالتده قالهیاتگنیدن شکایت قیلماقده. طالبان ولایتده کېنگ کۉلملی حربي موجودلیگینی سقلب قالیش بیلن بیرگه، اهالیگه قتّيق چېکلاولر، جملهدن، تونگی وقتده کۉچهگه چیقیش تعقیقینی جاري قیلگن.
آلدین هم پنجشیرلیک عادي فقرالرنینگ هېچ قندهی اساس کۉرسهتیلمسدن حبسگه آلینگنی حقیده کۉپلب حالتلر خبر قیلینگن. اَیریم حاللرده حبسگه آلینگنلر طالبانگه قرشی چیقیشده یاکه اوشبو گروهگه قرشی کورهشهیاتگن جبههلر بیلن همکارلیک قیلیشده عیبلنگن.
