غزنیدهگی منبعلرنینگ خبر بېریشیچه، اهالی و طالبلرنینگ یېرلرنی اۉزلشتیریب آلیش نینگ آلدینی آلیش کمیسیونی اۉرتهسیدهگی تۉقنهشووده شهردارلیک بولدوزری هیداوچیسی جان بېرگن.
تۉقنهشوو تیناوون (سهشنبه، ۲۷-اسد) غزنی شهرینینگ اوچینچی خوفسیزلیک ناحیهگه قرهشلی قلعه جوز منطقهده یوز بېرگن.
منبعلرگه کۉره، محلي اهالی شهردارلیک و طالبان نینگ یېرلرنی اۉزلشتیریب آلیش نینگ آلدینی آلیش کمیسیونی تامانیدن «دولتگه تېگیشلی» دېب تاپیلگن یېرلرنی قَیتریب آلیش بۉییچه آلیب باریلهیاتگن فعالیتگه قرشیلیک کۉرستگن و کمیسیون اعضالریگه قرهته تاش آتگن.
ترقهتیلگن ویدیولرده آدملرنینگ بولدوزر و طالباننینگ «رنجیر» موتریگه قرهته تاش آتهیاتگنی کۉرینهدی.
منبعلر غزنی شهردارلیگینینگ بولدوزر هیداوچیسی تاش تېگیشی عاقبتیده هلاک بۉلگنینی اَیتماقده.
طالبلرنینگ غزنی ولایتی خوفسیزلیک قوماندانلیگی هم تۉقنهشوونی تصدیقلب، یېرگه اېگهلیک مسألهسی یوزهسیدن یېرلرنی اۉزلشتیریب آلیش نینگ آلدینی آلیش کمیسیونی و اَیریم محلي اهالی اۉرتهسیده دستلب آغزهکی تارتیشوو یوز بېرگنی، کېین اېسه اهالی «کرین» هیداوچیسیگه قرهته تاش آتگنینی بیلدیرگن.
مذکور قوماندانلیک بیاناتیده یرهلنگن کرین هیداوچیسی دوالنیش اوچون کابلگه آلیب کېتیلگنی، بیراق جراحتلری آغیرلیگی سبب وفات اېتگنی ایتیلگن.
طالبلرنینگ غزنی ولایتی امنیه قوماندانلیگی اوشبو واقعه بیلن باغلیق روشده بیر نېچه گماندار حبسگه آلینگنی و حادثه یوزهسیدن تېرگاو دوام اېتهیاتگنینی معلوم قیلگن.
طالبلر بوتون مملکت بۉیلب اۉزلشتیریب آلینگن دېب حسابلهگن یېرلرنی قَیتریب آلیش جریانینی جدل دوام اېتتیرماقده. بو گروه حاضرگچه بیر نېچه تورر-جای مسسیولرینی دولت ملکی دېب اعلان قیلگن. بیراق اَیریم یېرلرنینگ اېگهلری اۉزلریده قانوني ملک حجتلری بارلیگینی اَیتماقده.
