طالبلر افغانستان مستقللیگینینگ ۱۰۷ییللیگی مناسبتی بیلن مملکت بیر عصر دوامیده اوچته بویوک دولتنی مغلوب اېتگنینی دعوا قیلدی.
طالبلر سۉزلاوچیسی اۉرینباسری حمدالله فطرت بوگون (چهارشنبه،۲۸-اسد) نشر قیلگن بیاناتده اوشبو گروه بویوک بریتانیا «جهادي جنگ» نتیجهسیده افغانستان مستقللیگینی تن آلیشگه مجبور بۉلگنینی ادعا قیلگن.
طالبلرنینگ ایتیشیچه، بوندن ۱۰۸ ییل اوّل عیناً شو کونی افغانستان خلقی «کوچلی جهادي جنگ» آرقهلی انگلیسلرنی افغانستان نینگ تۉلیق مستقللیگینی تن آلیشگه و مملکت نینگ تشقی سیاستینی یوریتیش وکالتینی تاپشیریشگه «مجبور قیلگن».
طالبان ۱۹۸۹-ییلده شوروی اتفاقی نینگ، ۲۰۲۱-ییلده اېسه امریکا نینگ افغانستاندن چیقیب کېتگنینی اېسلهتیب، ینه بیر بار «افغانستان بیر عصر دوامیده اوچته ییریک جهان دولتینی مغلوب اېتگن»، دېگن دعواسینی ایلگری سورگن.
افغانستاندهگی مملکت مستقللیگی ییللیگی صفتیده نشانلنهدیگن رسمي تاریخي تلقینگه کۉره، بوندن ۱۰۷ ییل اوّل، ۱۹۱۹-ییل ۱۹اگست کونی افغانستان نامیدن ایچکی ایشلر کمیساری و تینچلیک هیئتی رهبری علیاحمد خان همده بریتانيا هندستانی تشقی ایشلر وزیری و بریتانيا هیئتسی رهبری سر آ.اچ گرانت راولپیندی شرطنامهسینی امضالهگن.
اوشبو شرطنامه «اوچینچی افغان-انگلیس اوروشی»گه یکون یهسهگن. شرطنامهگه کۉره، بریتانيا نینگ اماناللهخان حکومتیگه مالیوي یاردم تۉلهشی تۉختهتیلگن و هندستاندن قورال آلیب کیریش امتیازی بېکار قیلینگن. شونینگدېک، بریتانيا افغانستاننینگ تشقی علاقهلرینی یوریتیش وکالتینی تاپشیرگن. عیناً شو حالت افغانستان «مستقللیگی» نینگ اساسی صفتیده قرهلهدی.
«اوچینچی افغان-انگلیس اوروشی» ۱۹۱۹ییل می آیی نینگ باشلریده باشلنگن و قریب بیر آی دوام اېتگن. بریتانيا ملي اوردو موزیمی معلوماتلریگه کۉره، اوروشده ۲۵۰ نفر بریتانيالیک حربي هلاک بۉلگن، ینه ۶۵۰نفری یرهلنگن.
افغانستان تامانیدن انیق آماری معلوماتلر موجود اېمس. بیراق تاریخي حجتلرده جنگ میدانیده قریب مینگ کیشی هلاک بۉلگنی قید اېتیلگن. ینه یوزلب کیشی اوروش دوامیده و اوندن کېین جراحت همده کسللیکلر عاقبتیده وفات اېتگن.
