پاکستان پولیسینینگ معلوم قیلیشیچه، بلوچستان ایالتی مرکزی کوېتهده نامعلوم قوراللی شخصلر تامانیدن اویوشتیریلگن هجومده اوچ کیشی افغانستانلیک هلاک بۉلگن، ینه بیر کیشی یرهلنگن.
هجوم سهشنبه کونی کېچقورون ( ۲۷ اسد) «هزار گنجی کراس» منطقهسیده صادر بۉلگن.
مذکور منطقه پولیس قوماندانی اۉرینباسری خضر حیات بی بی سی گه معلوم قیلیشیچه، افغانستاننینگ چاغی اولسواللیگیگه قرهشلی، افغانستان چېگرهسی یقینیدهگی دالبندین شهریدن تۉرت کیشی کوېته شهریگه کېلگن و قلعه عبدالله اولسواللیگیدهگی گُلستان حدودیگه یۉل آلهیاتگن پیتده هجومگه اوچرهگن.
پولیس معلوماتیگه کۉره، موترسیکلده بۉلگن ایکّی نفر نامعلوم قوراللی شخص بولرگه قرهته اۉق اوزگن. نتیجهده ایکّی کیشی واقعه جاییده هلاک بۉلگن، یرهلنگنلردن بیری اېسه شفاخانهگه آلیب باریلگچ وفات اېتگن.
هلاک بۉلگن اوچ کیشی نینگ شخصی حاضرچه معلوم قیلینمهگن.
هزار گنجی کراس منطقه پولیسی قوماندانی اۉرینباسری هجوم نینگ سببی حاضرچه نامعلوم اېکنینی و اونینگ سببلرینی انیقلش اوچون تېرگاو باشلنگنینی ایتگن.
شو هفته یکشنبه کونی هم افغانستان نینگ سابق حربي خدمتچیسی کوېته شهرینینگ شالکوت منطقهسیده نامعلوم قوراللی شخصلر تامانیدن آتیب اۉلدیریلگن اېدی.
مذکور سابق حربي خدمتچی حضرتالله اچکزی قندههار شهرینینگ ایکّینچی پولیس حدودی سابق باشلیغی و قندهارنینگ سابق پولیس قوماندانی عبدالرزاق اچکزی نینگ یقین کیشیلریدن بیری بۉلگن. سابق حربي خدمتچی نینگ جسدی تیناوون قندهارگه آلیب کېتیلیشی رېجهلشتیریلگن اېدی. بیراق منبعلرگه کۉره، طالبان چېگرهده جسد نینگ آلیب اۉتیلیشیگه تۉسقینلیک قیلگن.
