غربي کابلدهگی منبعلرنینگ ایتیشیچه، طالبان «شمع هدایت» مکتبی مدیری سالم صمیمی و اوشبو مکتبنینگ ایکّی اۉقیتووچیسینی حبسگه آلگن. بو مکتب دوشنبه کونی پارتلشگه گواه بۉلگن.
بیر منبع «اطلاعات روز» گزیتهسیگه معلوم قیلیشیچه، ایکّی اۉقووچینینگ آتهسی، کۉچه وکیلی و ینه ایکّی نفر محلي یشاووچی هم حبسگه آلینگن. منبعگه کۉره، محلي اهالی نینگ حبسگه آلینیشیگه کۉچهدهگی خوفسیزلیک کامرهلری نینگ بوزیلگنی سبب بۉلگن. اولردن بیرینینگ شخصی «دوکتور نادر» اېکنی ایتیلماقده.
منبعنینگ ایتیشیچه، بو شخصلر سهشنبه کونی (۲۷اسد) طالبان تامانیدن حبسگه آلینگن و حاضرگچه گروه قۉلیده سقلنماقده.
دوشنبه کونی (۲۶ اسد) ساعت تخمیناً 16:30 ده کابل شهری نینگ ۱۸-خوفسیزلیک ناحیهسیدهگی مهديه شهرچهسیده جایلشگن «شمع هدایت» خصوصي مکتبی حویلیسیده پارتلش صادر بۉلگن.
بیرلشگن ملتلر تشکیلاتی معلوماتلریگه کۉره، اوشبو پارتلشده ۴۲نفر باله جراحتلنگن.
پارتلش قندهی صادر بۉلگنی حقیده تورلی و بیر- بیریگه ضد معلوماتلر موجود.
پارتلشدن سۉنگ بیر منبع «اطلاعات روز» گزېتهسیگه مکتب قرشیسیدهگی کۉچهدن اونینگ حویلیسیگه نارنجک اولاقتیریلگنینی ایتگن. بو واقعه اۉقووچیلر درسلردن چیقریلگن پیتده صادر بۉلگن.
طالبلرنینگ کابلدهگی امنیه قوماندانلیگی سۉزلاوچیسی خالد زدران هم پارتلش قۉل بۉمبی نینگ اولاقتیریلیشی عاقبتیده یوز بېرگنینی ایتگن.
طالبلر مطبوعات سۉزلاوچیسی ذبیح الله مجاهد هم پارتلشنی «قۉل بۉمبهسی بیلن اویوشتیریلگن هجوم» دېب تعریفلب، هجوم قندهی صادر بۉلگنی، شونینگدېک، اونینگ اجراچیلرینی انیقلش و حبسگه آلیش بۉییچه تېکشیروولر دوام اېتهیاتگنینی بیلدیرگن.
بیراق طالبلرگه یقین عامهوي اخبارات واسطهلری وبیبیسی گه پارتلش اۉقووچیلردن بیرینینگ یانیده بۉلگن پارتلاوچی مادّه سببلی یوز بېرگنی حقیده خبر بېرگن. اوشبو خبرلرگه کۉره، پارتلاوچی مادّه اوروشدن قالگن بۉلیب، اونی اۉقووچیلردن بیری مکتب اطرافیدهگی تېپهلیکلردن تاپگنی تخمین قیلینماقده.
مذکور پارتلش کېنگ کۉلملی مناسبتلرگه سبب بۉلدی. بیرلشگن ملتلر تشکیلاتی واقعه قندهی صادر بۉلگنینی تېکشیریشگه چقیردی.
تأکیدلش جایزکی، کابلنینگ هزارهلر یشهیدیگن غربي حدودیدهگی مکتب و تعلیم مرکزلری بیر نېچه بار قانلی هجوملرگه اوچرهگن. اوشبو هجوملرنینگ اکثریتی اوچون جوابگرلیکنی «اسلامي دولت» (داعش) گروهی اۉز ذمّهسیگه آلگن.
