غزه ساغلیقنی سقلش ادارهسینینگ معلوم قیلیشیچه، اسرایل نینگ غزه شهریدهگی پولیس قرارگاهیگه اویوشتیرگن هوا هجومی عاقبتیده تۉقّیز کیشی هلاک بۉلگن. اسرایل اوردوسی اوشبو هجوم و غزه جَنوبیدهگی ینه بیر هجومده حماس قوماندانلریدن بیرینی نشانگه آلگنینی بیلدیرگن.
فرانس پرس خبریگه کۉره، غزه شهریدهگی شَفا شفاخانهسی اوشبو هجومدن سۉنگ تۉقّیز کیشینینگ، جملهدن بیر عیال و بیر قیزنینگ جسدی همده کمیده ۲۰ نفر یرهدارنینگ شفاخانهگه آلیب کېلینگنینی معلوم قیلگن.
حماس باشقرووی آستیده قوتقروو تشکیلاتی صفتیده فعالیت یوریتووچی غزه فقرا مدافعهسی تشکیلاتی هم قربانلر سانینی تصدیقلهگن.
اسرایل اوردوسی پولیس قرارگاهیگه اویوشتیریلگن هجومده حماس قوماندانلریدن بیرینی نشانگه آلگنینی ایتگن. اوردو معلوماتیگه کۉره، او غزهده اسرایل کوچلریگه قرشی هجوملرنی رېجهلشتیرگن.
اسرایل اوردوسی: «هجومدن آلدین تینچ اهالیگه یېتهدیگن ضررنی کمهیتیریش، جملهدن انیق نشانگه آلووچی قوراللردن فایدهلنیش و هوادن کوزهتوو آلیب باریش چارهلری کۉریلدی»، دېیه معلوم قیلگن.
اسرایل اوردوسی، شونینگدېک، غزه سکتورینینگ مرکزي قِسمیدهگی نصیرات حدودیده حماسنینگ حربي قناتی قوماندانلریدن بیرینی نشانگه آلگنینی بیلدیرگن.
غزه ساغلیقنی سقلش ادارهسی سهشنبه کونی هم اسرایلنینگ غزه شهریدهگی پورت حدودیگه اویوشتیرگن هوا هجومی عاقبتیده آلتی کیشی هلاک بۉلگنینی معلوم قیلگن. اسرایل اوردوسی اوشبو هجومده حماس نینگ بیر نېچه قوماندانلرینی نشانگه آلگنینی بیلدیرگن.
بو هجوملر اقش غزه اوچون اوزاق مدتلی تینچلیک رېجهسینی ایلگری سوریش بۉییچه ینگی سعی-حرکتلرنی باشلهگن بیر پیتده دوام اېتماقده.
حماس مطبوعات سۉزلاوچیسی حازم قاسم اسرایل نینگ «اۉت آچیشنی تۉختهتیش بۉییچه برچه چقیریقلرگه تۉلیق بېپیسندلیک» قیلهیاتگنینی قارهلهگن.
او امریکا جمهور رییسی دونالد ترامپنینگ اۉتگن ییل اکتوبر آییده کېلیشیلگن صلح رېجهسینی عملگه آشیریش اوچون مسوول بۉلگن تینچلیک هیئتی اسرایلنی اۉز مجبوريتلریگه رعایه قیلیشگه مجبورلش اوچون باسیم اۉتکزه آلمهگنی سببلی «اوشبو کېسکینلشوو اوچون مسوول» اېکنینی ایتگن.
ترامپ نینگ کویاوی و مخصوص وکیلی جرد کوشنر دوشنبه کونی اسرایل باش وزیری بنیامین نتانیاهو بیلن اوچرهشگنیدن سۉنگ، حماسنی قورالسیزلنتیریش و غزه تینچلیک رېجهسینی ایلگری سوریش بارهسیدهگی جریان بیر آی ایچیده باشلنیشی ممکنلیگینی ایتگن اېدی.
بیراق بنیامین نتانیاهو اوشبو رېجهنی قۉللب-قوّتلشدن باش تارتگن و فلسطین نینگ اوشبو اسلامي گروهی «حقیقتاً هم قورالسیزلنتیریلمهگونچه»، اسرایل کوچلرینی غزهدن آلیب چیقمسلیککه وعده بېرگن.
