ایران حکومتیگه قرهشلی یېتکرمهلر قائم حسینینینگ «اصفهان شهریدهگی علیخانی میدانیدهگی جنایتگه علاقهدار خارجي فقرا» صفتیده چیقریلگن اۉلیم جزاسی اجرا اېتیلگنینی خبر قیلدی.
خبرلرده بو شخصنینگ ملتیگه انیقلیک کیریتیلمهگن. بیراق خبرلرگه کۉره، قائم حسینی افغانستان فقراسی بۉلیب، اۉتگن ییل نینگ جدی آییده ایرانده بۉلیب اۉتگن ناراضیلیک نمایشلری چاغیده حبسگه آلینگنلردن بیری بۉلگن.
ایران محکمهسی حاکمیتیگه قرهشلی میزان اخبارات آژانسی قائم حسینی عربعلی اۉغلی، «آرین» لقبلی و خارجي فقرا بۉلیب، «علیخانی میدانیدهگی جنایت» همده بیر خیریه تشکیلاتیگه اتهیلب اۉت قۉییشده اشتراک اېتگن شخصلردن بیری بۉلگنینی یازدی.
اوشبو یېتکرمه خبریگه کۉره، قائم حسینی «قورال آلیب، قۉرقوو و خوفسیزلیککه تهدید یرهتیش آرقهلی محاربه، شونینگدېک، ملي خوفسیزلیککه قرشی حرکتلر آرقهلی یېر یوزیده بوزغونچیلیک قیلیش»ده عیبلنیب، اۉلیم جزاسیگه حکم قیلینگن. حکم بوگون اېرتهلب (پنجشنبه، ۲۹-اسد) اجرا اېتیلگن.
قائم حسینیدن تشقری، علیخانی میدانی ایشی بیلن باغلیق ینه تۉرت کیشی هم ایران اسلام جمهوریتی تامانیدن قتل اېتیلگن. افغانستان نینگ ینه بیر فقراسی،۲۳ یاشلی گل محمد محمدي هم اوّلراق اوشبو ایش بۉییچه قتل اېتیلگن اېدی.
ایرانده قتل اېتیلگن خارجي وطنداشلر آرهسیده اېنگ کۉپینی افغانستانلیکلر تشکیل اېتهدی.
ایران انسان حقوقلری تشکیلاتی معلوماتلریگه کۉره، ۲۰۲۵ییلده ایرانده کمیده۸۴ نفر افغانستان وطنداشی قتل اېتیلگن.
خبرلرگه کۉره، بو شخصلرگه قۉییلگن عیبلاولر نینگ اساسي قِسمی گیاهوند مادّهلر بیلن باغلیق جنایتلر، قاتللیک یاکه قصاص جزاسی همده جنسي تجاوز بیلن باغلیق بۉلگن.
ایران انسان حقوقلری تشکیلاتی معلوماتیگه کۉره، ایرانده افغانستان وطنداشلرینی قتل اېتیش حالتلری کۉپهیگن.
