بریتانيانینگ «چتمهاوس» نامی بیلن تنیلگن قیراللیک خلق ارا مناسبتلر انستیتوتی افغانستان عیاللرینی اوشبو تشکیلاتنینگ ییللیک مکافاتی ساورینداری دېب اعلان قیلدی.
تشکیلات بوگون (پنجشنبه، 29-اسد) بېرگن بیاناتیده افغانستان عیاللری و قیزلری طالبلرنینگ چېکلاولری، تعقیبلری همده تیزیملی جندر باسیملریگه قرشی جسارت و متانت نمایش اېتگنینی تأکیدلهدی.
«چتمهاوس» مدیری و اجراچی باشلیغی برونون مدوکس شوندهی دېدی: «افغانستان عیاللری اولرنی تعلیم، ایش و جماعت حیاتیدن چیقریب تشلشگه قرهتیلگن تیزیملی اورینیشلرگه قرشی عجایب جسارت و برداشلیلیک کۉرستدی».
«چتمهاوس» دهگی آسیا-تینچ اقیانوسی مسألهلری بۉییچه تدقیقاتچی فرزانه شیخ نینگ ایتیشیچه: «2026-ییلگی «چتمهاوس» مکافاتینینگ افغانستان عیاللریگه بېریلیشی اولرگه تۉلیق مناسبدیر و اولر نینگ قرشیلیگی همده جماعتچیلیک خاطرهسیدن هېچ قچان اۉچیریلمسلیک قطعیتینینگ دلیلی دیر. طالبان حکمرانلیگی آستیده جاري اېتیلگن قطعي و کمسیتووچی قانونلرگه قرشی اولرنینگ متانتی عیاللر حقوقلری تېنگلیگی و ینه-ده عدالتلی گلوبل کېلهجک غایهسیگه صادق بۉلگن برچه انسانلر اوچون نایاب نمونهدیر».
«چتمهاوس» دهگی جَنوبي آسیا مسألهلری بۉییچه کتّه تدقیقاتچی چیتیج بجپایینینگ ایتیشیچه، طالبلرنینگ قَیته حاکمیتگه کېلیشیدن کېین هېچ بیر گروه افغانستان عیاللری و قیزلریچهلیک جبر کۉرمهگن.
اونینگ قۉشیمچه قیلیشیچه: « چتمهاوس» مکافاتینی افغانستان عیاللریگه بېریش آرقهلی، افسوسکی، خلقارا همجعیت اعتباریدن چېتده قالهیاتگن اوشبو مسأله حقیده خبردارلیکنی آشیریشگه اۉز حصهمیزنی قۉشماقچیمیز».
اوشبو مکافات جاري ییل آخریده «چتمهاوس» ده بۉلیب اۉتهدیگن مخصوص مراسمده افغانستان عیاللریگه تاپشیریلهدی.
شونینگدېک، بریتانيا قیرالی، قیراللیک خلقارا مناسبتلر انستیتوتینینگ حاميسی تامانیدن امضالنگن حجت هم اولرگه تقدیم اېتیلهدی.
«چتمهاوس» لندنده جایلشگن نفوذلی سیاسي تدقیقات انستیتوتی بۉلیب، اونینگ فعالیتی ژئوپولیتیکی معمالر و خلقارا مسألهلرنی اۉرگنیشگه قرهتیلگن. اوشبو تشکیلات مکافاتی 2005-ییلده تأسیس اېتیلگن. اوکراین جمهور رییسی والادیمیر زلنسکي، «چېگره بیلمس شفاکارلر» تشکیلاتی و ژورنالیستلرنی حمایه قیلیش کمیتهسی اوّلگی مکافات صاحبلری حسابلنهدی.
