طالبلر تامانیدن سابق حکومت عملدارلری بیلن موافقلشتیریش اوچون توزیلگن «افغان شخصلر بیلن علاقه کمیسیونی» رئیسی شهاب الدین دلاور، سۉنگی بېش ییل دوامیده جمهوریت حکومتی نینگ قریب بیر مینگ تۉرت یوز کیشی حربي و ملکی رسمیلری مملکتگه قَیتگنینی ایتدی.
دلاور پنجشنبه کونی (۲۹ اسد) اعلان قیلینگن بیبیسی بیلن صحبتیده افغانستانگه قَیتیش و سابق حکومت عملدارلری نینگ مملکتده یششی اوچون هېچ قندهی معما یۉقلیگینی ادعا قیلدی.
اونینگ ایتیشیچه، حاضرده سابق وزیرلر، وزیر اۉرینباسرلری، حاکملر، جنراللر و سابق پارلمان اعضالری کبی کۉپلب عملدارلر مملکتگه قَیتگن، اَیریملری اېسه عموماً مملکتنی ترک اېتمهگن.
اونینگ سۉزلریگه کۉره، سۉنگگی بېش ییل ایچیده «علاقه کمیسیونی» بیلن موافقلشتیریش آرقهلی جمعی بیر مینگ۳۸۸ نفر سابق عملدار مملکتگه قَیتگن.
طالبلرنینگ علاقه کمیسیونی رئیسی اوشبو صحبتده: «سابق عملدارلرنینگ نه مملکتدن چیقیشی، نه مملکتگه کیریشی چېکلنگن؛ حاضرده هر بیر افغان هېچ قندهی قۉرقووسیز اۉز مملکتیگه قَیتیشی ممکن»، – دېدی.
او قَیتیب کېلگن اَیریم عملدارلر چېکلاولر و مامقبول مناسبتلرگه دوچ کېلگنی سببلی ینه مملکتنی ترک اېتگنی حقیدهگی خبرلرگه جوابن، «عملدارلرنی مملکتنی ترک اېتیشگه مجبور قیلهدیگن هېچ قندهی چېکلاو یۉق»، دېدی.
بو حالت اوّل هم اَیریم سابق عملدارلر افغانستانگه قَیتیب، طالبلرنینگ خوفسیزلیک کوچلری بیلن باغلیق مناسبتلردن شکایت قیلگن حالده مملکتنی ترک اېتگنی حقیده خبرلر ترقهلگن بیر پیتده یوز بېرماقده. شونینگدېک، اَیریم سابق حربيلر مملکتگه قَیتگنیدن کېین اۉلدیریلگن.
بیراق شهاب الدین دلاورنینگ ایتیشیچه، طالبلرنینگ هېچ بیر عملداری یاکه استخباراتی، مدافعه و ایچکی ایشلر وزیرلیکلری خادملری سابق عملدارلرنینگ اوییگه باریشی ممکن اېمس، حتا اولرگه قرشی هېچ کیم محکمهگه دعوا هم بېره آلمهیدی.
او سابق حکومت عملدارلری نینگ سیاسي فعالیتی و عامهوي اخبارات واسطهلری بیلن صحبتلشیش امکانیتی حقیده گپیرر اېکن، طالبلر تامانیدن «هېچ قندهی چېکلاو» یۉقلیگینی ایتدی.
بیراق شو بیلن بیرگه، او باشقهچه فکر بیلدیریب، سابق عملدارلر فقط «یامان نیتده بۉلمهسه، فعالیتی اسلامي دایرهسیده و افغانستان منفعتلری اساسیده بۉلسه همده تیزیمگه قرشی بۉلمهسه»، سیاسي فعالیت بیلن شغللنیش حقوقیگه اېگه اېکنینی تأکیدلهدی.
شونینگدېک، او سابق عملدارلرنینگ اهالی و ژورنالیستلر بیلن اوچرهشیشی حقیده گپیرر اېکن، علاقه کمیسیونی بونگه قرشی اېمسلیگینی، بیراق طالبلرنینگ استخبارات، مدافعه و ایچکی ایشلر ادارهلری اۉزلری نینگ مخصوص ایش ترتیبلریگه اېگه بۉلیشی و اولر سابق حکومت عملدارلری نینگ بوندهی فعالیتیگه تۉسقینلیک قیلیشی ممکنلیگینی ایتدی.
او، شونینگدېک، سابق حکومت عملدارلری نینگ مال-ملکی و ملکلری حقیده گپیریب، «عمومي عفو» اساسیده اولر نینگ سۉنگی ۲۰ ییل دوامیده آرتتیرگن برچه مال-ملکی اۉزلریگه تېگیشلی اېکنینی، مال-ملکلری مصادره قیلینمهگنینی و اولر بیلن هېچ قندهی حساب-کتاب قیلینمسلیگینی ایتدی.
بو حالتگه قرهمهی، حاضرگچه سابق حکومت نینگ بیرار عملداری سیاسي فعالیت باشلهمهگن یاکه طالبان باشقروو تیزیمیگه قۉشیلمهگن.
شونینگدېک، کابلده قالهیاتگن سابق حکومت عملدارلرینینگ یقینلری طالبلر تامانیدن اولرنینگ حیاتیگه تورلی چېکلاولر قۉییلهیاتگنی حقیده خبر بېرگن.
سابق حکومت نینگ اَیریم سیاسي عملدارلری طالبلر اولرنینگ شخصي مال-ملکی و ملکلرینی مصادره قیلگنی حقیده خبر بېرگن. جملهدن، تخمیناً تۉرت آی اوّل سابق حکومت پارلمانی اعضاسی کۉفی طالبان حتا آته-آنهسیدن میراث قیلیب آلگن اجدادي اویینی هم مصادره قیلگنینی معلوم قیلگن.
