ایران تشقی ایشلر وزیرلیگی سۉزلاوچیسی اسماعیل بقایی، پاکستان اوردوسی باشلیغی عاصم منیر اېرتهگه هیئتگه باشچیلیک قیلگن حالده تهرانگه تشریف بویوریشینی معلوم قیلدی. پاکستان ایران و امریکا اۉرتهسیدهگی مذاکرهلرده واسطهچیلیک قیلماقده.
بقایینینگ ایتیشیچه، اوشبو تشریف ایران و پاکستان اۉرتهسیدهگی ایکّی تامانلهمه همکارلیکنی مستحکملش همده اسلام آبادنینگ منطقهده تینچلیک و خوفسیزلیکنی کوچهیتیریشگه قرهتیلگن سعی-حرکتلرینی دوام اېتتیریش مقصدیده عملگه آشیریلهدی.
اونینگ سۉزلریگه کۉره، عاصم منیر تشریف دوامیده ایران نینگ یوقاری مرتبهلی رسميلری بیلن اوچرهشوولر و مذاکرهلر اۉتکزهدی.
پاکستان سۉنگّی آیلرده ایران و امریکا اۉرتهسیده واسطهچیلیک قیلیشگه اورینیب کېلماقده. تهران و واشنگتن پاکستان واسطهچیلیگیده صلح بۉییچه کېلیشووگه ایریشگن اېدی، بیراق بو کېلیشوو بیر نېچه هفتهدن سۉنگ برباد بۉلدی.
امریکا و ایران اۉرتهسیدهگی هرمز بۉغازی مسألهسیدهگی کېلیشماوچیلیک اسلامرآباد کېلیشووینینگ عملگه آشیشیگه تۉسقینلیک قیلدی و ایکّی تامان بیر نېچه هفته دوامیده اۉزارا تۉقنهشدی.
ایران و امریکا اۉرتهسیدهگی بېواسطه تۉقنهشوولر تۉختهگن بۉلسه-ده، امریکا اوردوسی ایراننی دېنگیز آرقهلی قمل قیلیشنی دوام اېتتیرماقده. دونالد ترامپ حکومتی اېسه تهرانگه قرشی ینگی و کېسکین چېکلاولر جاري اېتیلیشی حقیده معلوم قیلدی.
ایران هم نفت تشیش اوچون مهم بۉلگن هرمز بۉغازینی یاپیق حالده سقلب توریبدی و واشینگتن تهران شرطلرینی قبول قیلمهگونچه، بۉغاز آچیلمسلیگینی بیلدیرگن.
دونالد ترامپ بیر نېچه بار هرمز بۉغازی آچیقلیگینی ایتگن بۉلسه-ده، یقینده اوشبو بۉغازنی امریکا حدودینینگ بیر قِسمی دېب حسابلشینی معلوم قیلدی.
